面對周末令人吃驚的經濟數據，中國即時有新招回應，但再非傳統的減息降準等放水行動，而是再推央企重組方案。中遠系和中海系齊齊停牌，加埋有傳國務院已批准國企改革方案，改革概念股唔炒就有鬼。恒指昨早段多跌逾400點，其後跌幅收窄並一度倒升，但收市仍跌31點，國指則升63點，但與A股大漲相比差一大截。

近日國企重組概念再受追捧，中航運有望成為下一波整合對象。（資料圖片）

雖然內地出口數據及PPI均顯示經濟差到無倫，但阿爺勝在識得變魔法，合併呢樣嘢向來廣受市場歡迎，所謂協同效應、增加議價能力等大家耳熟能詳，總之引發無限想像空間，數落有兩鐵、兩船、三桶油、電訊股、煤炭股、航空股、鋼鐵股、中糧系、招商局系、中旅系，再加埋一批垃圾國企受惠於傳聞中的「中國淡馬錫」入股注資，幾乎無一落空，但可惜丟低咗內銀股，合併無份兼屬最賺錢行業，估值低又如何？

過度合併憂壟斷

假設航運股真係傾合併，兩系股份隨時停牌一個月以上，呢類尋寶遊戲好難維持得耐，以中車（01766）為例足足搞咗大半年。鐵路及航運之後，如果飛機都玩埋合併，就完成海陸空壟斷；亦有人認為煤炭及鋼鐵業屬熱門，因為通常愈經營困難愈大機會重組。不過，阿爺已講明合併是為增強國際競爭力，如果是針對內地市場，等於搵客戶和消費者笨，所以飛機和電訊業其實機會不大。

滙豐證券潑冷水話，航運業合併重組效益並不明顯，原因是運力佔比依然很少，不足以有定價能力，就算合併後可成為全球第四大船隊，但市佔率亦僅得8%，而首15大公司仍會保持全球77%運力。其實所謂協同效應最明顯及即時好處是裁員縮皮，但現時中國最驚係失業率上升影響社會穩定。

至於對業務的幫助因行業而異，中車可謂經典，一度變成「神車」，然後又「翻車」；合併之後競爭對手不會坐以待斃，內地上半年訂單反而縮減，而合併後新管理層亦有磨合期，短期盈利幫助肯定不明顯。

至於中遠及中海系是否可成為「神船」是後話，畢竟可能有排停牌，等睇埋實質公布內容才作定奪未遲。其他航運股乘勢做好，包括中外運航運（00368）及太平洋航運（02343）等。航運股近期的有利因素大家都知，包括油價下跌、波羅的海乾散貨指數（BDI）急升及新國策支持等，但奇怪股價受惠不多，只有重組股在上周五有春江鴨掃起。

太航勝在較靈活

睇慣BDI的投資者都知道，該指數一向大上大落，現時雖然從低位回升一倍，但相對歷史高位仍只得一成，而內地進出口均呈跌勢，雖謂最艱難時期已過，惟距離順風順水仲有好遠。航運股搞合併其實並不稀奇，早年就有中外運同長航合併，巴克萊估計中航運同招商局集團或成下一波整合對象，投機就如「估」票，買唔買得中部分靠運氣。

若睇番盈利，中航運已發盈警，估計上半年盈利大幅下跌或甚至大幅虧損；相反，太航扭虧為盈賺575萬美元，並獲瑞信調升目標價，昨股價升達8%。太航冇合併重組憧憬，完全睇基本因素，公司上半年業績由擴充自有船隊、縮減開支及租金遠勝市場平均水平所帶動，私人企業的優勢是靈活多變，國企無論重組幾多次都學不來，在自由競爭市場仍是效率不高。

不過，航運股最終需服膺於市場環境，太航在業績報告中對市場仍傾向於悲觀，同時期望商品價格觸動推動庫存進入回補期，但認為復甦的轉捩點非常難以預測。隨着油價回落，滯後的BDI亦會見頂，航運股未宜高追，但個別如太航估值存折讓的可考慮低吸。