港股上周五高開47點後升幅迅即擴大，恒指高見24,638點，可惜係威係勢完一輪後，又再窄幅上落，恒指埋單升177點，收報24,552點，國指升134點報11,227點，主板成交得713億元，相對仍然淡靜，但在大市回升下，市場氣氛都好番些少，主板有935隻股份升，多過跌的410隻，唔少股份都有番些少鑊氣。

中國機械拓展海外市場進度理想，新增合約不斷。

上周五表現最標青的非航運股莫屬，中海集運（02866）大升23.9%以3.11元收市，中國遠洋（01919）亦升13.56%，收報4.94元，中海發展（01138）亦升12%，收報5.49元。航運股有追捧，主要受惠於BDI指數上升及油價低企，加上有消息指中遠和中海兩大航運央企將於近日組建「改革領導小組」，令市場憧憬兩個集團的整合可在三個月內制訂初步的改革方案。

內地股民入市意欲低

事實上，航運股低迷已一段長時間，藉好消息炒上惟升勢過急，在整體市況仍偏淡之下，阿莊恐怕佢哋升完一日後好快無影，現水平追入風險唔細。

內地股市亦做好，滬綜指升82點報3,744點，深成指升331點，收報12,753點。中證監與券商基金召開會議，表示會在四方面繼續穩定市場，中央穩定股市決心顯然易見。然而，經過六月尾七月頭的股災後，唔少散戶仍坐艇中，即使個市唔再跌，但手上持有的股票仍未返家鄉，至於手頭仍有資金者，見個市唔醒神，入市意欲都大減。所以中央在穩定市場之餘，真係要諗諗計點先可以重拾投資者對股市的信心。

中央上半年透過寬鬆貨幣政策刺激經濟，但未見成效，內地經濟下行壓力仍然大，市場普遍預期中央在下半年會加大基建投資，以達到保七的目標。故此，近日基建股亦見蠢蠢欲動，中國機械工程（01829）上周五急升逾一成，以6.53元收市。其實大摩上周初已經發功，預計中國機械在未來六十日有七成至八成機會上升，結果股價迅即有異動。

受惠於亞投行的成立，料發展中國家的基建投資規模未來可迅速壯大，並可望帶動中國構械未來新增合約上升。近年，集團在拓展海外市場進度理想，今年先後在老撾及塞爾維亞等取得不同類型的工程合約，預期在新增合約理想帶動下，盈利未來將顯著復甦。

該股現價往績市盈率只10倍，估值吸引，股價在5.7元水平橫行個多星期後，上周五成交增加配合下突破，料中線反覆向好，建議吼位買入，初步阻力7元關。