本港樓價高企，又有唔少新盤排住隊推出，最近吸引咗唔少人加入代理行列搏殺，劉Sir睇番地產代理監管局數據，截至七月底持牌代理人數有36,738人，比六月多咗358人，總人數係一三年七月之後最多，而單月增加人數亦係一二年十一月以來最快。不過，整體樓宇買賣登記喺七月份只錄7,338宗，按月少咗8.2%，計番即係平均5名代理先做到1宗買賣，想入行嘅朋友真係要諗清楚。

近期不少人見新盤排隊登場，加入地產代理行業搏殺。（資料圖片）

地監局啱啱公布咗最新統計數據，截至七月底持有個人牌照有36,738人，該數字係自一三年七月後最多，而相比起六月份就多咗358人，仲已經連續八個月出現增長。

劉Sir發現，原來自從一二年十一月後，就未試過單月有超過300名代理入行，亦反映市場對樓市走勢都幾有信心。

不過，睇番土地註冊處最新數據，七月份整體樓宇買賣登記錄得7,338宗，比起六月少咗約8.2%，所牽涉嘅成交總額亦少咗7.3%，得番約莫554億元。

住宅登記 量跌價升

若以最新錄得嘅持牌代理人數計算，即係每宗成交要由5名代理攤分，比起對上一個月由4.6人攤分1宗成交，競爭情況又激烈咗。

睇番住宅買賣情況，上個月住宅買賣登記有5,393宗，按月少咗大約6.6%，但係總成交金額就增加咗約莫3%，去到大約446億元水平，係近九個月最多。

二手交投 新界最旺

老友中原黃良昇話，分返開一、二手住宅買賣登記，上個月一手住宅登記有1,082宗，按月減少約27.9%，其中宗數最多嘅係將軍澳帝景灣，佔514宗，其次何文田天鑄就有63宗。而期間整體一手登記金額所牽涉嘅總金額，就按月增加咗約12.8%去到161.4億元。

至於二手交投就逆市上升，七月份二手買賣登記按月增約3%至4,010宗，大型屋苑以新界上車盤表現最好，其中天水圍嘉湖山莊同埋沙田第一城，就分別錄得70宗同59宗買賣登記。