同樣被封為「女神主播」的周嘉儀（Venus），剛好也是數月前才轉投金融界，現為興證（香港）市場拓展部聯席董事。自言一向有留意財經資訊的她，原來早於○六、○七年便坐了多轉新股「順風車」。

她表示：「當年嘅新股熱潮好厲害，幾乎每星期都有新股上市，而且好少會潛水，所以自己成日揀啲Hit嘅嚟抽，每次分到一、兩手啦。啱啱出嚟做嘢一段時間，抽IPO賺幾百、一千已經好開心，會拎嚟買吓衫同鞋，剩番嘅就儲起。」

積少成多 滾夠百萬

對她來說，不論男女，都需要有「私己錢」以備不時之需，故認為養成儲蓄習慣很重要。「初出嚟做嘢時，即使人工唔多，得萬一、二蚊，都會規定自己每個月儲起最少3,000蚊，積少成多，幾年後已經儲到筆唔錯嘅金額。我都幾欣賞自己可以嚴守呢個儲蓄習慣。」至今，她仍每月將人工約四成簡簡單單地存入銀行，而她的私己錢至今已滾大至以百萬元計。

長揸好股 最短三年

作為一位經濟獨立的事業型女性，單有私己錢當然不夠。周嘉儀早已有樓揸手，現與胞姊一同供款，算是半個業主。另一方面，她亦有建立自己的投資組合，每月撥三成人工買入股票、基金及保險；股票均以高息穩健型藍籌為主，持有約五隻。「之前跌市都有少許帳面損失，但無做任何交易。個人傾向中長線持有，最少會揸三年。」

她笑言，轉行後，家人以至身邊朋友都有問她取「貼士」和「冧把」，但她自認仍是金融初哥，只敢買正股；又強調投資前最緊要做足功課，以及衡量個人可承受的投資風險。至於事業上的挑戰，則可謂一浪接一浪。「五月底剛完成EMBA（高級管理人員工商管理碩士）課程，正準備考取證券經紀牌。不過，公司日後會推保險業務，所以有時間都想考埋個保險牌，學多啲嘢幾時都係有好無壞。」