核心區舖價回落，但民生區舖位就逆市做好，紀惠集團副主席廖偉麟同劉Sir講，下個禮拜就會拆售牛池灣嘉峰臺商場，亦都係佢哋今年首個全新商場拆售項目，入場費約250萬元，預計沽出全數27個舖位，可以套現約3.1億元，較今年二月份嘅購入價升值逾七成，而未來亦會部署拆售北角御皇臺商場。

牛池灣嘉峰臺商場下周開始拆售，舖位入場費約250萬元。（資料圖片）

紀惠集團副主席廖偉麟表示，牛池灣嘉峰臺商場屬今年首個全新商場拆售項目。（資料圖片）

牛池灣嘉峰臺商場拆售資料

廖偉麟話，嘉峰臺商場總樓面面積約3.07萬方呎，涉及27個舖位，分布喺地下同一樓，地下舖位面積約800至4,000方呎，意向呎價約5,000元，一樓舖位面積約500至1,200方呎，意向呎價約1.5萬至1.6萬元，舖位入場費約250萬元，最貴就6,000多萬元，預計全數舖位沽出後可套現3.1億元，而家已經有率先有6個舖位預售咗，套現約莫1億元。

睇番資料，其實佢喺今年二月份以1.75億元購入嘉峰臺商場，照咁計，全數沽清後帳面升值77%。

佢仲話，商場所有舖位間隔都無改動，而一樓舖位仲新增咗去水位，可以配合唔同嘅商戶，所有舖位將會連租約出售，而近期該商場舖位租金升幅表現好理想，其中一個由便利店租嘅地舖近排續租，租金升咗1.2倍，而一樓幾個舖位亦有兩成半升幅。

柴灣永利沽130車位

尋日撞到投資者蔡志忠，佢話柴灣永利中心車位拆售項目暫時沽出130個，仲有70個車位待售，佢自己就會保留30至40個收租。

另外，佢哋旗下彩虹匯八坊商場剛以約4,000萬元沽出地下一個由銀行承租巳嘅舖位，面積約1,800方呎，呎價逾2.2萬元。佢又話，早前以2.82億元購入嘅北角御皇臺商場之後都會部署拆售。

中資洽租灣仔全幢

商廈市場屢錄破頂成交，劉Sir八到灣仔會展廣場辦公大樓高層一個單位，面積約3,000方呎，以呎價約3.2萬元沽出，除創下該廈呎價新高之外，更加係全港商廈呎價次高。

另外，英皇國際（00163）旗下灣仔告士打道60號全幢商廈獲中資機構洽租，料月租高達470萬元。

另外，美聯游院玲話，灣仔船街1至7號地下1號舖及一樓全層以1.3億元放售，該行李婉琪話，粉嶺安樂門街農業地皮標售，佔地約14,602方呎，經補地價後可興建為工業或工廠大廈，料市值約2億元，截標日期為下月二十五日。