股市經歷急瀉之後極速反彈回穩，發展商拿拿聲發力推盤，下個月新盤市場勢將回復熱鬧。新地（00016）尋日就預告旗下東涌東環發展項目第二期東環II，下個月將會上載樓書同埋開盤，仲講到明呢期單位景觀比第一期仲靚，用料有所提升，加上區內一、二手樓價係咁升，今期會較第一期有唔少提價空間。

新地雷霆（左）表示，集團會保持月月有樓賣，東涌東環II下個月將開售。右為胡致遠。

長實郭子威（中）指，維港．星岸最快下周開價。

市場近期部分新盤部署

新地副董事總經理雷霆尋日同劉Sir講，東環II早排已經攞咗預售文件，下個月將會上載樓書同開售，今期提供932伙，景觀比第一期仲好，用料亦有所提升，由於過去幾個月區內一、二手樓價已錄到唔少升幅，料東環II比第一期有唔少提價空間。

新地代理助理總經理胡致遠補充，年初開售嘅東環，平均成交呎價近1.1萬元，東環II嘅單位面積同一期相若，間隔都係多元化，兩房戶佔約45%，三房戶佔約30%，一房戶則佔約25%。

除主攻上車新盤外，豪宅市況都繼續活躍。長實地產投資董事郭子威話，紅磡維港．星岸示範單位本周率先開放畀代理參觀，最快下周開放畀公眾同公布開價。

匯萃料八月獲批預售

佢認為，雖然房協推盤令中小型樓盤有壓力，但對豪宅影響唔大，而且市場不斷有豪宅新盤呎價創新高，個別近期成交呎價超過4萬元，認為具參考價值，該盤有機會挑戰相關價錢水平。

該盤所有分層戶都配備咗德國品牌LEICHT廚櫃，未計廚房電器嘅價值，每戶廚櫃嘅價值約110萬至160萬元，整個項目分層戶廚櫃總值逾3億元。

宏基資本（02288）副總裁洪英偉都話，尖沙咀官涌街7號匯萃，係集團首個住宅項目，屬單幢式設計，提供66伙，全部都係開放式戶，實用面積逾200方呎，估計下個月可獲批預售文件，售價參考同區物業。另外，大埔逸瓏灣I日前更新部分價單，其中4伙加價約5.6%至12%。

銷監傳嚴管新樓招標

另外，消息人士透露，一手住宅銷售監管局啱啱發信畀發展商，提醒佢哋以後透過招標出售新盤時，如果喺截標日期前出售物業，就會違反條例規定，發展商若要更改截標時間，必須發出更新銷售安排，意味着發展商唔可以好似之前咁，突然公布截標前出售一手物業。