上周中港股市經歷瘋狂過山車，雖然周四及周五大部分個股升得唔錯，但其實都係輸少當贏。既然睇唔通後市，就不如要短炒多幾轉，密食當三翻！

上周四軟件及網遊股反彈得唔錯，但網龍（00777）、雲遊（00484）及IGG（00799）周五都先升後回，反之博雅互動（00434）仍然升4.2%至4.38元收市，既然股價如此硬淨，當然要望多兩眼。

先睇基本面，雖然博雅早前公布今年第一季業績表現麻麻，純利按年下跌7.46%至5,759萬元（人民幣．下同）；收入則升10.1%至2.44億元，而當中網頁遊戲收入按年下跌8.9%至1億元，移動遊戲則上升28.9%至1.43億元，反映移動遊戲確實一如外界預期，取代網遊成為集團最大收入來源。

事實上，現時人人用手機上網多過用電腦，而且這趨勢亦難以逆轉，故集團近年已積極推動手遊業務，以圖抵銷網遊疲弱對收入的影響。

現金充裕利併購

最值得留意的是，博雅財務狀況良好，手持淨現金逾10億元，且截至去年底止並無任何負債，再考慮埋正值今時今日大跌市之際，街外隨時有平貨賣，若然集團年內有併購活動，更有機會成為股價向上催化劑。

走勢上，集團股價六月中失守6.3元（港元．下同）支持後反覆下跌，上周四及五快速反彈，以周五收市價計，往績市盈率8倍，PB得1.8倍，估值既已屆吸引水平，不妨分注吸納，博重上6元關都有逾三成的潛在上升空間，跌穿4元止蝕。