市區重建局馬頭角北帝街/新山道項目將會喺聽日截標，而市建局就全數邀請晒32家有份遞交意向書嘅財團入標競投。劉Sir有測量師老友覺得，雖然近排股市波動可能會令財團出價審慎啲，但係呢個項目規模始終唔大，相信唔會影響到發展商入標嘅信心，而市場估值最高就約莫7.42億元。

市建局北帝街項目明日截標，項目提供約160個單位。

市建局北帝街項目基本資料

劉Sir知道，呢個市建局北帝街重建項目，地盤面積大約1.17萬方呎，提供約莫8.78萬方呎住宅樓面，預計興建大概160個住宅單位，其中半數單位嘅實用面積唔可以多過480方呎，而每個單位嘅實用面積亦都唔可以少過260方呎，另項目設約1.76萬方呎商業樓面。

雖然最近市場氣氛唔多唔少受到股市波動影響，好似老友美聯測量師行林子彬就咁認為，佢認同股市波動或會令到發展商出價審慎咗，但唔會因為咁而放棄競投項目，而且呢個明日截標的北帝街項目嘅規模同埋投資額始終都比較細，所以發展商入標並無壓力。

攻中小型戶 明截標

再者，項目提供中小型單位為主，亦切合民生需要，而地舖部分亦具有一定價值，林子彬估計，項目每方呎樓面地價約莫6,000元。計番呢個項目嘅估值大約6.32億元，至於市場估值就介乎約5.27至7.42億元。

劉Sir知道，今次北帝街項目嘅招標模式同過往無異，若將來中標財團賣樓收益達16.8億元，即係呎價大約15,954元，就要向市建局按比例分紅，當達標後首個4,000萬元分紅比例係20%，去到第二、三個4,000萬元，就要分紅30%及40%，而達標1.2億元以上嘅比例就係50%。

呎價15954須分紅

唔經唔覺，原來市建局對上一個推出嘅馬頭角重建項目，已經係舊年四月批出嘅新山道住宅發展，睇番當時嘅招標文件，項目將來售樓呎價去到約11,729元，發展商就要分紅，而聽日截標嘅北帝街項目則要約15,954元，對比番就明顯高咗約36%。

市建局北帝街項目基本資料

位置：馬頭角北帝街 / 新山道

佔地：約11,701方呎

總樓面：約105,306方呎

提供單位：約160伙

市場估值：5.27至7.42億元

每方呎樓面地價：約5,000至7,000多元。

截標日期：明日