中央連番出手救市，但希臘搞唔掂，公投結果令脫歐風險大增，恒指隨內地股市輕微高開18點之後，最多升197點，但好景維持不到半個鐘，恒指很快掉頭下挫，之後跌勢加劇，一度失守250日線，低見24,750點，最多跌1,313點，直至歐股開市跌幅無預期般大，港股亦由低位反彈。

「互聯網+」國策推動下，作為行業領導的騰訊可受惠。（資料圖片）

埋單恒指大跌827點，收報25,236點，國企指數跌377點，報12,231點，跌幅分別3.18%及2.99%，全日成交金額2,127億元。

救市效果遜預期

在阿爺出重手之下，滬綜指終於止跌，收市升89點，報3,775點，但深成指仍然要跌170點，收報12,075點。內地股市明顯動力不足，相信阿爺即使再出招，都只會係事倍功半，阿莊覺得倒不如放手減少干預，任由市場自己進行調節好過，咁樣股市先至可以正常健康咁發展。

好明顯今年五窮六絕推遲咗一個月，變咗六窮七絕。睇番統計數據，尋日主板有1,533隻股票下跌，上升的只有93隻，認真誇張。事實上，早前唔少細價股都係由內地資金炒起，家陣內地股市唔掂，資金自然要班師回朝。目前大市氣氛唔好，投資者要錢唔要貨，現階段跌完未真係好難講，所以阿莊暫不建議投資者撈入細價股。

事實上，希臘事件一日未明朗，相信全球股市都唔會有運行，港股亦難以獨善其身，因此現階段仍需審慎為上。雖然對後市唔多睇好，但如果投資者想入市撈底，阿莊覺得買入重磅股會較值博，始終大市反彈的話，先行的應該是大價股，其中騰訊（00700）可以列入觀察名單。

集團將於下月十二日公布中期業績，由於首季已多賺6.6%，至68.8億元人民幣，較市場預期理想，估計中期業績亦不會令投資者失望。

行業發展料加速

此外，在「互聯網+」之下，內地將大力推動互聯網由消費領域向生產領域拓展，加速提升產業發展水平，騰訊作為行業的領導，相信可從中受惠，估計未來發展會加快，前景應可看高一線，不妨趁跌市收集。