昨日滬綜指最多跌逾6%，收市跌3.4%報3,912點，最重要係跌穿市場認為是中央第一道防線的四千點關，反映A股人心虛怯之餘，亦揭示今轉「央媽」出手時機及力度似乎控制得唔太好，令後市有機會出現陰陰落市況。而A股若然運滯，港股要獨善其身似乎不是易事。

昨日認股證 / 牛熊證市場數據

昨日恒指雖不跌反升32點，但查實藍籌股中只靠友邦（01299）、銀娛（00027）、騰訊（00700）、中移（00941）及金沙中國（01928）撐住，單單上述五隻股份已為恒指貢獻137點，加上全日上升股份得三百幾隻，相反下跌股份逾千隻，暗示大戶隨時係撐住指數來沽貨，不得不察也。

殺牛誘因高於屠熊

再睇埋其他數據，大家可能會睇得更全面。首先，恒指牛熊街貨比例上周五為84：16，本周二變成68：32，昨日更見55：45，暗示博反彈資金已無咁勇。其次，恒熊現時重貨區為26,800至27,299點收回價之間，涉及4.3億份街貨，相當於765張期指；至於恒牛重貨區已降到25,300點至25,799點收回價之間，涉及15.69億份街貨，相當於2,667張期指，可見大戶殺牛的動機仍遠大於屠熊。

策略上，現時股市風高浪急，不妨揀隻硬淨藍籌股博「追跌」，話唔定中頭獎。友邦昨日是貢獻恒指最多的藍籌股，達36點升幅。走勢上，恒指自五月尾反覆下跌後，六月二十五日開始現三連陰，但友邦卻繼續守穩四月中至今橫行區內，昨日更逆市升1.9%，絕對具追跌空間。另外，截至周二止的最近五個交易日，友邦好倉及淡倉分別有224萬元及23萬元流出，資金似乎偏向睇淡。短線看淡可考慮友邦瑞信沽（20739），行使價45.83元，實際槓桿約15.9倍，一五年九月到期。

此外，早前A股爆升時，市場曾炒作內險企業可因而受惠，但近期A股累跌不少，相關板塊早已轉弱。當中國壽（02628）股價自五月尾高位40.2元拾級而落，昨日再跌1.9%，收報33.1元，現價已貼近四月A股爆升前的起步位，加上MACD態叉收窄，小注博反彈可揀中壽高盛購（22818），行使價36.88元，實際槓桿約5倍，一五年十二月到期。