Fundman睇市：合生元跟大戶撈貨

睇見A股粗暴的波動，短短大半個月高位最多跌兩成七之多，實在難以想像，呢個民智未開的股市，假如沒有停牌斷路機制，可以大生大死去到邊個境界。港交所（00388）阿頭李小加剛剛先拍完阿爺馬屁，盛讚A股係最安全且透明的股市，真係唔識就嚇死，識就笑死。

睇見由上星期「央媽」雙降開始，轉頭搵剛剛話要規範兩融的中證監，來個打倒昨日的我，話兩融仲有上升空間，跟手似層層傳國家隊用退休金入市掃貨，再來減交易徵費及傳減印花稅，可謂托市托到亂晒章法。

現實歸現實，去年十一月人行第一次減息至今，內地經濟數據睇唔到重大改善，瘋狂的流動性只係頂住個樓價唔跌，股市狂升，但股市表現講到底都要同經濟及企業營收掛鈎，無可能長期脫節，尤其內地大媽被熊市折磨七年，今次驚死執輸，唔少借爆孖展，由滬深兩市之前成交屢破世界紀錄可見，當過分槓桿的股市一爆，斬倉潮之下，跌過龍亦都在所難免，亦都唔係央媽想托就托得起。

希臘公投定生死

反而四月狂升幾日後，一直完全唔肯跟A股癲的港股，似乎仲有一絲希望。當然，由四月初高位累積跌介乎五成至九成的二三線，筆者相信中短線恐怕都好難番到家鄉，但地產、電訊一類較正路的藍籌及中型股，希臘公投定生死之後，應該可以搵到支持。

今次希臘搞到咁大劑，始作俑者係年初被希臘人民推上總理一職的左翼聯盟領袖齊普拉斯，同IMF傾債養債談判，居然臨埋門仲要搞全國公投，實行交波畀選民，推卸所有政治責任。

網上見爛仔總理近兩日依然出力慫恿國民周日去投票，向債權人協議說「不」，佢講緊唔係叫希臘人捱過國家破產的陣痛，反而主張即使違約，歐盟都無權即時踢希臘脫歐，等同向全國人民鼓吹一味撒賴，實在令在下眼界大開，心裏真係想睇希臘計錯數被踢出歐元區一了百了。

姑勿論點都好，較難掌握只係市場到底反映多少「Grexit」一刻的震盪，由歐元到依家都未再試上次1.05低位，個人主觀覺得，周日結果無論點，港股狂插機會唔多，反正這幾星期已經行先一步，所以今日諗住酌量買些少港股ETF，博有意外驚喜。

基金焗買濠賭股

講番尋日個市，響A股再瀉之下，恒指有32點進帳，講到尾，六月基金經理不斷減磅之後，無可能成手現金等運到，多多少少都要搵股票買，跌得最早的濠賭股，即使短期睇唔到營收有改善，但潛在跌幅可能比大市為少，已經係佢哋狂吸的理由，亦都頂住尋日恒指唔下跌。反觀二三線卻係屍橫遍野，超過千三隻股票插水，硬要爬逆水的，可以留意乳業股。

原乳價大跌之後，對伊利（600887.SH）、蒙牛（02319）兩隻龍頭，本身毛利率就有一定的好處，近年兩間公司都朝着高端乳製品、擴闊毛利的方向去發展，唔少分析更指表現比佢哋預期為好。蒙牛股價高位落咗唔少，預期市盈率21倍左右，已經可以諗諗。

另外，工信部早幾日搞了一個嬰幼兒配方奶粉企業兼併重組工作會議，簡而言之內容又係朝行業整合、淘汰落後中小型產能、扶持及優化產業升級之如此類，見基金股合生元（01112）今轉股價由41.59元殺到落21元唔見一半，近幾日低位成交多番唔少，似有大戶收集之迹象，看官可以睇實。