隔晚美股做好，道指升138點，而內地再次出招救市，分別宣布調低A股交易結算相關收費標準，以及落實兩融管理新規，允許券商自主決定強制平倉線，受消息帶動，港股高開209點，惟已見了全日高位，之後大市反覆回落，期間更一度倒跌114點，收市雖然力保不失，但全日僅升32.29點，收報26,282點，至於國企指數則跌196點，收報12,784點，全日成交金額1,508億元。

在近日的跌市中，中燃等燃氣股表現相當硬淨。（資料圖片）

尋日恒指升，主要靠濠賭力撐，國企指數跟恒指背馳不在話下，而好多股份都逆市向下，而且唔少跌幅都唔細，睇番統計數據，全日主板有1,195隻股票跌，升的只有325隻，同跌市根本無乜分別，證明投資者對後市都幾悲觀。

勿對救市過分憧憬

事實上，投資者對後市悲觀無可厚非，早排A股升，港股都唔跟升，家陣A股跌，港股當然無運行，而阿爺出盡法寶之下，A股都升唔起，尋日滬綜指跌140點，以3,912點收市，深成指則跌726點，收報12,924點，跌幅分別3.48%及5.23%，由於市場氣氛偏淡，即使阿爺再出招，相信亦難以扭轉大市弱勢，投資者家陣不宜對中央的救市措施有太大憧憬，否則在存有過大期望之下而盲目衝入，最終可能蒙受不必要損失。

尋日唔少跌幅都超過一成以上，睇番好多股仔喺大時代之下升幅動輒幾倍，即使近日由高位跌咗不少，但較起步位仍然有相當可觀的升幅，所以如果大市氣氛仍然未能扭轉的話，投資者在仍然有盈利的情況下，會狠心沽貨。

在今轉升浪之中，燃氣股表現明顯跑輸大市，所以大市近日回落，燃氣股表現反而變得相當硬淨，而有過千隻股票下跌的情況下，中國燃氣（00384）昨日升3.7%以12.88元收市。中燃截至三月底止全年，錄得純利33.71億元，按年升30.89%，期內共銷售89.7億立方米天然氣，按年升11.6%。

集團今年目標售氣量為110億立方米，按年升23%，一七年度目標140億立方米，按年升25%，銷氣量明顯加快，估計隨着售氣量的增加，集團的盈利應可保持理想的增長。此外，公司上月與主要股東簽訂戰略合作框架協議並成立合資公司，此舉料可加快開拓液化石油氣、燃氣供熱、壓縮天然氣、液化天然氣、城市燃氣輸送，以至開拓印度天然氣市場對業務，料成立合資公司長遠對提升盈利及開拓海外市場有正面效益，故可逢低吸納作中線持有，目標價14.5元。