上星期五A股暴跌，滬綜指下跌334點，跌幅達7.4%，創七年來最大跌幅，深成指則跌1,293點報14,398點，跌幅8.2%。北大人眼見形勢唔對路，股市再跌實體經濟定會出事，所以於周六突然宣布減息兼定向降準救市，相信今日開市勢必反彈。

新海一直奉行低庫存業務模式，減低油價波動的影響。（資料圖片）

港股上周五在內地股市下跌拖累下急挫，恒指最多跌622點，尾市跌幅雖然收窄，但仍跌481點報26,663點。在大跌市之下，主板有1,280隻股票下跌，升的只有211隻，而近日熱炒的股仔，在大跌市之下，明顯收斂咗，只有個別股份繼續逆市做好。

股份拆細咪亂炒

近排除炒賣殼股之外，玩分拆及送紅股的股份亦成為市場追捧對象，好似早前宣布將股份一拆二的普甜食品（01699），股價就逆市升近一成。至於隻節能海東青（02228），上周五宣布一送二紅股，亦刺激股價做好，最高更升過上5.25元。

其實，公司將股份拆細後，如果每手買賣單位無變的話，令投資者入場費降低，有助吸引一般小投資者參與，增加股份流通量，對股價應有正面影響，故近日有唔少股份都玩拆細，或送紅股變相拆細，但係投資者要注意公司拆細後估值是否合理，市盈率是否偏高，否則被拆細誤道下，分分鐘變買貴貨。

另外，新海能源（00342）上周五在跌市中表現堅挺，股價逆市升1.83%以3.88元收市。去年國際油價急跌，市場一度擔心會影響公司的經營及盈利，但由於集團一直奉行低庫存、高效物流的業務模式，無論是LPG或油品買賣，均以成本加利潤或背對背的定價方式進行，以減低價格波動所帶來的風險。即使去年油價大跌，集團的盈利仍然錄得14.9%升幅至9億元。

集團位於珠海碼頭今年二月開始營運，相信有助降低買油成本，提升利潤。由於公司在控制成本上一直不遺餘力，相信可保持利潤率之餘，亦可維持公司的競爭優勢。

早前公司一度跌至100日線水平，低見3.47元，但於該水平明顯有支持，近日股價由低位穩步回升，周五以全日高位3.88元收市。現價計往績市盈率只有6倍幾，估值吸引，不妨吼位收集，目標4.7元。