Fundman睇市：吉汽現價博得過

值得留意，是滬股通使用額度變化，上周四用得7億多人仔，上周五急升十倍以上飆升至78億，本周二仍有66億人仔，可見外資趁大媽跳船之際，來一個逆向操作，尋日早晨之星都出埋，以為無死，但要小心可能只係一廂情願，皆因滬股通旺得兩日咁大把，尋日又再呈現沽凸情況，淨流出31億人仔，可見外資基金對今浪A股，不過抱住有食就食的短炒心態。

尋日中國結算最新數據，上周（六月十五日至十九日）A股新開戶數見高峰回落，得99萬戶，比前周勁跌三成，大媽爭崩頭開戶熱情漸見不再，上周參與交易A股投資者亦按周跌至3,479萬戶。基於兩融短期見頂，A股頗依賴新增開戶提供新資金支撐，數據對A股後市並非吉兆也。

與此同時，人行已經有一排無進行逆回購放水，銀行又面臨半年結要做靚盤數，內地頭寸漸緊，睇番一個月期人民幣同業拆息，由三月近5厘碌到落五月底的2.26厘，近日已輾轉回到去3.45厘，低位回升近五成二之多。過去大半年的A股升浪，實質經濟復甦因素欠奉，由此推斷，短期調整可能仲未完，不妨睇埋半年結後再算未遲。

富智康盈喜支持

昨日港股升71點，收27,404點，成交又再縮番去1,170億元，較有氣勢的藍籌有三桶油及股王騰訊（00700），後者抽升3.5%，一隻股票貢獻恒指93點。

收市後，富智康（02038）發盈喜，預期截至六月底止半年綜合溢利淨額，介乎1.2億至1.35億美元，對比去年同期4,983萬美元大升1.4至1.7倍，對比去年全年賺1.69億美元，今年業績報復式反彈幾乎可以肯定。按半年營收，一五年度盈利頗大機會超越大行估計的2.2至2.3億美元，加埋短期印度建廠消息確認，股價在4.3至4.6元上落區整固之後，應該唔使幾耐睇5元樓上。

阿里影業（01060）宣布與美國派拉蒙合作，投資《職業特工隊：叛逆帝國》。近年荷里活愈來愈睇重中國市場，早排《狂野時速7》，不但破中國票房歷史紀錄，狂收3.9億美金，居然仲勁過美國本土的3.5億票房收入，美國電影公司見到邊會唔流晒口水。

搵機會泊大碼頭，一來搵更多企業掟錢落去做植入式廣告方便啲，其次亦希望上畫之初，盡量多搶院線屏幕全力吸金，可惜今次合作細節，例如拆帳形式未見詳情，恕小弟都唔識點分析，到底市值835億的阿里影業，依家係值定唔值。

新車款備受看好

四月大時代之後，久沉的汽車股，有迹象重獲睇基本因素的芬佬關注，其中跌得最傷的華晨（01114）連抽兩日，而尋日隻吉利汽車（00175）走勢悅目，升2.2%，收4.17元。

早排瑞信出報告，話睇過吉汽準備於年底推出的新車款NL-3設計後，印象深刻，調高該車款推出後的銷售預期。尋日輪到美銀美林唱好，話GC9車款有機會帶動吉汽SUV車系進入熱賣周期，全年銷售目標有機會由原來的45萬調高到49.8萬。查實睇番吉汽五月份銷售，單月升25%去到3.84萬部，帶動首五個月銷量去到21.9萬部，按年升幅40%，已相當於全年銷量目標45萬部的49%，半年數據出埋，下半年又有新車款應市，調高一五年銷售目標相信是遲早問題。

在春江鴨偷步力吸手影下，吉汽過去兩日累升近7.7%，以美林一五及一六年每股盈利預測0.351元及0.497元人民幣計，今、明兩年市盈率只有9.5倍及6.7倍，以一六年超過四成的每股盈利增幅，目前股價幾抵博。