香港地少人多，車又多，市場對車位需求極大，升值潛力比起住宅單位絕不輸蝕，好似有「摸王」之稱的資深投資者黎汝遠咁，最近佢以高價沽出咗北角和富中心相連車位後，乘勝追擊，入咗3票認購將拆售嘅柴灣永利中心車位。佢話睇好車位價格今年仲有兩、三成上升空間。另外，啱啱紅磡黃埔花園有個雙號車位，亦以243萬元登記成交，有機會係該屋苑嘅車位新高價。

柴灣永利中心有200個車位將拆售，現正收票。（資料圖片）

投資者黎汝遠看好車位前景。（資料圖片）

近月純車位註冊變化

劉Sir知道，投資者蔡志忠、羅珠雄同陳秉志早排夾份用咗超過9,000萬元，買入柴灣永利中心幾層停車場共約200個住宅車位，佢哋最近拆售呢批車位，現正收緊票，而近排高價沽出北角和富中心相連車位嘅黎汝遠，啱啱就入咗3張票認購。

黃埔車位243萬新高

黎汝遠同劉Sir講，港島區鐵路沿線嘅車位嚴重短缺，之前唔少作為臨時停車場嘅空置地盤都畀回收重建，所以都幾睇好車位前景，佢估計今年嘅車位價格仲有兩、三成上升空間。

依家要買車位真係百零二百萬走唔甩，土地註冊處資料顯示，紅磡黃埔花園有個雙號車位，啱啱以243萬元登記成交。聽代理老友講，呢口價創咗該屋苑新高。

近排車位表現唔錯，業主放售車位都幾有信心，劉Sir打探到，上環信德中心2樓有兩個車位，以800萬元放售，即係每個車位約莫400萬元，如果真係落實成交，會追平該廈早排創出嘅最高車位成交價紀錄。

另中原老友話，大角咀洋松街38號I-Home一樓同二樓加埋共10個車位，以1,550萬元放售。

核心區舖租睇跌30%

零售寒冬進一步打擊舖市，戴德梁行話，由去年中至今，銅鑼灣羅素街舖位租金已累積下跌43%，為舖租跌幅最大的核心區街道，而尖沙咀廣東道及中環皇后大道中則分別跌33%及10%，該批街道舖租已返回一一年至一二年水平，料全年核心區舖租至少下跌30%。

該行阮仲賢又話，中環及金鐘區今年第二季商廈空置率跌至3.6%，為四年新低，同時該區期間商廈單位吸納量逾36.48萬方呎，料區內租金全年升最多15%。

另外，為搶吸人才，萊斯物業日前更將營業員拆佣比例調升至60%，本月起每名新人及介紹人可獲數千元以作鼓勵。