Fundman睇市：金山軟件隨時反彈

大堆數字，意味着美國啟動加息，經已進入最後直路，據彭博統計，最多經濟師預測九月美國會發生第一加，不過聯邦基金利率期貨、期權計出機率顯示，賭真金白銀的，認為最大機會係今年底，即係十二月十六日的議息會上，耶倫先至會郁手。

值得留意，舊年下半年到今年三月，人人睇死美國加息殺到埋身，資金蜂擁回流美元資產，美匯指數由80水平，狂升到三月份見100.7，創十二年新高，但愈近九至十二月的加息期，近排美元反而有反高潮現象，今年三月至今，三個頂有一個低過一個的趨勢，執筆時美匯指數得93.7，高位計累積已貶值7%，十年美債息都由2.5厘高位落番去前晚2.26厘收。

係咪市場對息魔出動預期確認，趁機出貨鳴金收兵？抑或睇死聯儲局在歐日持續量寬，美元由低位大反彈對經濟冷卻作用漸現，睇死佢最終加息只會係一次起，兩次止？暫時睇兩個可能性都同時存在。

大市成交續縮

昨日港股早市悶到發慌，上午散場時，無論成交額與波幅都毫無睇頭，真係估唔到，下晝市況會峰迴路轉，中午政改踩turbo一樣，比預期更快進入表決，跟手建制派擺越位陷阱，卻又忘記通報隊友，搞出個世界級笑話，結果期指重開，好淡友開價亂晒籠，十五分鐘內先急插後急抽，之後陰陰落，收市恒指跌59點，報26,694點，主板成交回落至1,062億元，是四月港股大時代以來最奀。

其實以昨日A股的跌幅，早排唔跟升的港股跌得算少。但問題是四月至今，無論基金大戶抑或魚缸友，都諗住有買貴無買錯，因為預期之後會有大媽落嚟接火棒，結果今日唔單止未見大媽與公募基金蹤影，而且A股仲有腳仔軟的迹象，相信短期港股要炒番上去，幫27,000至28,500點的巨型密集蟹貨區鬆綁，只怕唔係咁容易。

東航有勢破位

前晚美國議息之後，紐約期油落番去60美元樓下，昨日東航（00670）、南航（01055）各升4.6及5.2%，尤其東航更一度有勢升穿近月的橫行區，可惜即市由6.89元高位撻番落6.5元，收得唔算靚，今日又睇吓破唔破到四月初高位6.8元。尋日指混改好處會係心理大於實際，話口未完，炒消息的交行（03328）捧場客有收兵迹象，尋日再落2.3%，收報7.75元。

數落，近期襟炒都算係「互聯網+」概念，騰訊（00700）及阿里巴巴近排表現一般，不過二線的IT翹楚，走勢頗標青。上星期提過的網龍（00777），股價成功破10日線，升7.7%，收36.75元，向住四字頭目標進發。

網龍啱啱宣布向英國上市的教育問題方案供應商Promethean提出要約，收購價上限1.3億美元，收購規模大約等於網龍市值6%左右，但朝着教育的方向投資，吸引到芬佬胃口。

至於另一心水金山軟件（03888），早排發完可換股債券，再加埋月初在27.4元批股攞錢，果然有「濕平」跟尾，同網龍一樣「走出去」，收購美國納市掛牌的世紀互聯全部股份，後者主要從事管理式網絡服務、雲服務等。

隨着中國網絡估值愈來愈高，除了騰訊、阿里，今日連金軟都開始玩高估值批股要錢，再買入資產維持未來增長的遊戲，芬佬至鍾意呢類故仔。睇返金軟早排批股撞啱跌市，股價潛到26元樓下，經過一輪收集，有迹象短期做好個W底反彈，尋日回到10日線及批股價樓上，走勢漸見改善，如果上番去批股首日高位29.05元，證明新貨源入強手，短期可以留意。