美國議息後未有加息，進一步為本港樓市沖喜，港島居屋再錄癲價，香港仔居屋嘉隆苑三房山景單位自由市場賣788萬元，成為港島第二貴居屋單位。而屯門單幢樓業主亦成功賣出辣招貨，萬寶大廈高層一房單位，約一年半轉售扣埋辣招稅都賺逾50萬元。

美國聯儲局不急於加息，本港居屋錄多宗高價成交。（資料圖片）

香港仔居屋嘉隆苑三房山景戶，自由市場價賣788萬元。（資料圖片）

二手樓市高價成交一覽

中原周世康同劉Sir講，香港仔今個月有3宗居屋買賣，平均實用呎價超過1.03萬元，其中嘉隆苑D座高層2室，實用面積645方呎嘅三房單位，向東望山，都賣成788萬元，實用呎價12,217元，樓價同呎價都創屋苑新高，新買家買嚟自用，原業主○九年以300萬元買入。

劉Sir記得，全港島最貴嗰間居屋，係柴灣樂翠臺一個1座高層單位，成交價去到790萬元，今次呢個嘉隆苑三房單位雖然平兩萬元，都創港島居屋第二高紀錄，如果計埋紅磡家維邨賣800萬元嘅成交，全香港就排第三。

世紀21溢榮林曉怡話，筲箕灣居屋愛蝶灣3座高層G室，實用面積592方呎，望到少少海，綠表價賣560萬元，實用呎價9,459元，樓價同呎價都創屋苑居二市場新高。

珀麗灣488萬明賺實蝕

屯門賣地後，區內二手市起哄。代理爆料，地皮賣出嗰晚，有外區上車客，即以348萬元，買咗區內居屋兆禧苑A座中層單位，樓價創屋苑新高，實用呎價8,386元係同類新高。

美聯溫忠輝都話，同區單幢樓萬寶大廈高層A室，一房單位辣招盤，賣283萬元，實用呎價約10,760元，畀埋額外印花稅，一年幾原業主帳面即賺54.7萬元。但中原溫明峯話，馬灣珀麗灣31座高層A室，減22萬賣488萬元，兩年只升值9.7%，扣埋辣招稅同使費要蝕錢。

粉嶺中心實呎九千五

私樓做價月月升，同行黃家全講，奧運站帝柏海灣2座中層F室賣880萬元，同類兩房戶一個月內賣貴20萬元，實用呎價逾1.86萬元。消息稱，粉嶺中心F座高層單位賣512萬元創新高，實用呎價9,570元。