Fundman睇市：聯想更具值博率

希臘債務談判進入最後直路，但就削減退休金問題上的立場，同IMF仲係大纜都扯唔埋，希臘國民開始識驚，怕最後會被迫出歐元區，存戶紛紛將貨幣轉換成網絡虛擬貨幣bitcoin，刺激過去兩年由1,230美元狂瀉八成六，最低去到164美元水平，比希臘國債更垃圾的虛擬貨幣，失驚無神死貓彈，周二晚狂升7%。

照現時劇情發展，相信希臘九成機會最終要跪低求IMF施以援手，總理齊普拉斯除在談判桌上攞出一副流氓賴債姿態外，最叻就只係在面書上unfriend德國總理默克爾，其餘可以做的真係唔多。

上周民調顯示，過半數希臘國民唔滿意談判發展，77%希望能夠達成協議，讓希臘留在歐元區內，在在可見年初態度強硬的左翼支持者，轉軚者眾，在缺乏民意支持下，等於齊普拉斯同人晒冷前已經被對手揭了底牌，仲邊度有成功偷雞的可能？所以相信最後大步檻過的機會相當大。

混改外資唔睇好

A股連續兩日急插後出現後抽，恒指跟升187點，收報26,753點，可惜成交唔配合，主板交投啱啱過千二億關，比周二跌市仲奀，依然係一副有氣無力的姿態。尋日焦點係交行（03328）混改方案獲國務院批准，股價朝早係威係勢，高開0.44元，以8.25元承第一口價，但亦係全日高位所在，最後收7.94元，升0.13元。

市場趁好消息出貨唔係無道理，事實上，唔少外資行睇死混改行唔通，一方面國家要保有控股、管理的絕對地位，另一方面又想引入民營資本，說穿了，情況同當年國有銀行陸續進行股份制改革後安排上市，引入外資策略股東分別唔大，回望今日除了錢多無碇使的淡馬錫，仲對內銀不離不棄之外，其他四大行的外資股東，早已通通沽貨去矣。

近期IPO焦點，非數聯想（00992）阿媽聯想控股（03396）莫屬，聯控的「畀面派對」確係架勢，廿四個基礎投資者陣容鼎盛，平保（02318）、中國人壽富蘭克林、彤叔及中再都在名單內。不過，聯想唔單止無出現子憑母貴情況，在阿媽籌備上市期間更係弱過藥煲，恒指都仲未衰到跌番去四月八日中證監放公募基金入市的起步位，但聯想尋日收市價11.06元計，卻已低於四月二日收市價11.2元。

綜合企業逆潮流

聯控持有聯想30.56%股權，IT貢獻佔69%，較重秤的資產包括地產發展商融科智地、兩間金融公司弘毅投資及君聯資本，去年房地產佔盈利比重12.5%，金融服務佔13.8%，另外包括口腔醫療、物流、養老院及聯營公司神州租車（00699）歸入現代服務，佔比重13.8%，仲有還未止血的農業食品、化工與能源材料投資。

毫無疑問聯控是巨型級的綜合民企，但今日上市企業走向專門化，以分工精確作重點發展，爭取較高估值的潮流下，綜合型企業有點不合時宜。簡單講，如果憧憬聯想IT業務，未必想配搭房地產及投資公司一起押注，相反亦然，尤其見預期市盈率較同屬綜合企業的復星（00656）要高，假如在定價範圍中上遊拍板，吸引力只屬一般。

反而聯想近月受市況及基金換貨部署影響，估值返到稍低於五年中位數的16倍樓下，似乎值博率高些少，短線以12.5至13元為目標。