Fundman睇市：綠地香港隨時翻炒

上周五的升市，同傳聞深港通有眉目不無關係，惟上周四、五，一連兩日升市成交得千二、三億元，同跌市時的高成交額比較，唔多啱比例，周五升市睇落純粹係好友趁現貨交投淡靜來個突襲，唔多似春江鴨收到風偷步炒起個市，等好消息出貨。

近排滬港通有幾「熱鬧」，大家有眼見，上周五北向僅花掉一成二額度，南向用得一成，魚缸對深港通落實同滬港通擴大額度如此熱切期望，實在唔易理解。不過炒股就係咁唔理性，尤其消息市，傳深港通有下文，港交所（00388）發威之外，炒家午後蜂擁追入本地證券股，華富國際（00952）大升20%，耀才證券（01428）升14.8%，時富金融（00510）升10.2%。既然滬港通叻唔到去邊，深港通幫到本地證券行生意，可以預期是心理大於實際，相關股份再追價值唔大。

富智康有力炒上

有外媒話印度官員證實富智康（02038）準備在印度選址設廠，未來為蘋果公司代工的iPhone及iPad，可能轉到印度生產線去。作為輕工業龍頭，此舉證實今時今日中國勞動力市場已經再唔可以同價廉物美畫上等號，跟其他新興市場相比下，更多廉價勞動力新血可以補充。

於代工界中，以規模效益及夠平取勝的富智康，卻多個邊際利潤有機會擴闊的故事，仲唔似機械人取代人手咁得個吹字，月初炒過一浸上4.68元，抖完氣之後應該有條件再炒上。

中國實體經濟唔得，中央的「互聯網+」概念，原意鼓勵傳統產業結合資訊科技，走到線上為本業增值，不過，從線下走到線上會唔會變得易賺錢，則有待時間去證明。惟股市卻異常受落，上至大路的網上金融、社交網絡，下至寵物店，物業管理公司上網，乜都炒得一餐。

銷售表現唔失禮

五月綠地香港（00337）以每股7.46元批2.28億股，集資16.8億元，準備進軍房地產相關互聯網金融業務，當時收到風攞到貨的基金唔多，事實見綠地批完股後，表現異常硬淨，一直企穩8元水平，但去到早兩星期，二三線爆發小股災，綠地亦跟住插水，最低見6.17元，但投降盤一過，股價隨即抽番上7元水平。

綠地最近公布首五個月銷售數據，即使期內無新盤推出，銷售仍按年升兩成五，下半年較多新盤推出，估計全年銷售應較一四年有長足之進，核心房地產生意的營運，可幾睇高一線。

進軍互聯網金融，可能會被指與其本業風馬牛不相及，成敗難料，但原來綠地香港控股公司綠地集團，早於四月就已經同阿里巴巴旗下螞蟻金服合作，發布首個互聯網房地產金融產品，當時首批2億元人民幣規模、6.4厘回報的高息產品，首小時經已賣光，第二批規模2.5億元人民幣的，也在一日內全部獲得認購。

估計第三批六月中會推出，今次唔同嘅係會經由綠地香港旗下綠地金服進行，乃集資之後的第一擊。睇番首兩次的成績，難怪高管有信心首年的交易量幾可去到百億元人民幣。

去年綠地香港每股帳面值4.9元人民幣，計落市帳率1.15倍，以純地產股而言，唔算特別平，但互聯網金融對整體估值肯定有拉動作用。早排野村出報告同佢斬件計價，地產生意值9.35元，打個九折，加埋房產金融及網上金融各值0.6及1.28元，畀10.3元目標價，有一定參考價值。睇上周五股價受制於10日線，一旦升穿，應有機會上番8元樓上，可以睇實。