青衣的疑似新沙士病人，證實只係虛驚一場，港股昨收復部分失地，恒指升220點，報26,907點，主板成交縮至1,243億元，多少反映大戶睇唔通市況，都選擇靠邊站，令昨日的升市似技術反彈多於一切。

估值貼近近年下限的副食品股，下半年或有機會跑出。（資料圖片）

太陽日誌

上討論區，見到有網友開post套用影帝張家輝金句「依家無，將來一定會有」去睇今次MERS，即新沙士疫情會在香港擴散，皆因想博沙士一疫歷史重演，等高企不下的樓價有插水機會，等無殼族可以圓置業夢。

你問我，疫情去到當年沙士般大規模在社區爆發，樓市價唔會跌，答案係肯定的，不過，大家可能對十幾年前發生的事有點模糊，誤會當年香港樓價高位狂插七成，完全係沙士「功勞」。事實上，○三年疫情不過係送香港經濟同樓市最後一程，真正令樓市崩潰的是亞洲金融風暴。回顧○三年疫症爆發，樓價由年初多跌11%之後，隨着疫情過去，個人遊等措施開通，經濟復甦，年底樓價經已升凸。

近排港股與A股背馳情況持續，開始見到大股東增持，回購消息變得頻繁，尋日最搶眼肯定係介紹分拆上市無耐的長實地產（01113），超人增持消息刺激股價升3.7%，成為升幅最大藍籌。

內房壓力非輕

另外，中國旺旺（00151）亦有回購行動，翻查年初至今，經已進行過十二次回購，由年初8.45元買到近日的8.01至8.12元，今浪回購頻率比一三、一四年的兩輪都要高，大行估今年業績見底回升。睇番一五年預期市盈率17倍，貼近近年的估值下限，到底完全唔跟市走的副食品股，會唔會下半年食番個尾胡，由回購的舉動，睇嚟8元輸面唔大，應該唔會死錯人。

北京對樓市調控態度一百八十度轉，近日傳「限外令」取消，有機會在全國實施，意味樓市全面歡迎境外資金幫手掃樓。回顧四、五月內地樓市數據，無論價量都已經有見底反彈之勢，之不過，內房股早於三月偷步升咗唔少，形成近日銷售數據再好，市場興奮程度都打上折扣，反而見好消息出貨情況。

另外亦有賓架認為，早排恒大（03333）事先張揚的批股要錢，初期市場反應冷淡，最後不惜跳樓價，減完再減都要批，反映較進取的發展商，融資及套現壓力唔細，若非有更大的刺激政策出台，短期內房股要去番五月初的高位並唔容易。

澳優賣枱搲頭

澳優乳業（01717）賣枱，股價升4.7%，收報3.08元。去年公司獲台灣晟德大藥廠購入25.84%舊股，成為最大股東後，昨宣布晟德再向九間機構組成的聯席要約方，額外購入20%股權，每股作價3.01元涉及5.94億元，超過全面觸發點，依例向其他街外股東以同價3.01元提出全購要約，交易也成為台灣企業來港收購上市公司的首例。

澳優從事嬰幼兒配方奶粉，晟德則經營嬰兒、小童及長者及特殊護理病人使用的口服液藥物及配方藥。搵到段台灣報道，高管指收購是晟德的十年擴張計劃第一步，準備未來購併至少五個歐美食品公司，再將產品銷往中國市場。

有3.01元的保護傘撐住，短期澳優股價應該不成問題，但以一間市值29億，本身奶粉經營生意只係普普通通，去年僅賺9,021萬人仔，差不多26.5倍PE或2.62倍市淨率的公司，實在已經搞唔清到底係依家殼價貴咗，抑或晟德對澳優信心十足，交易後有其他盤算？