昨日A股飄到無影，滬綜指曾跌逾5%，尾市卻倒升0.7%；創業板更誇張，最多跌7%，但最終跌幅收窄至0.9%，而滬深兩市成交加埋逾兩萬億元人民幣，可見A股確實幾「情緒化」。市場賽後檢討主要受內地部分券商收緊創業板兩融業務，以及市傳中央有機會增資產增值稅影響。

睇番昨日板塊各走各路，早前升得幾好的鐵路股如中鐵（00390）、中鐵建（01186）及中交建（01800）皆跌；至於一眾內銀股即市先升後跌再彈，主要受市傳銀行混改方案已上報國務院，預期方案兩周內將獲批有關，傳會成試點的交行（03328）升5.5%；早前調整多時的賭股亦逆市反擊。至於跌得最慘烈的，相信非早前升得頭頭是道的細價股莫屬，無他，在市場猜疑北水隨時「華麗轉身」下，要率先逃生的一定是這類實力欠佳的股份，大家短期落注宜考慮有關因素。

人和毋須趕食胡

策略上，既然現時風高浪急，不妨選擇較穩健股份出擊，早前提及港股通重倉股人和商業（01387）不經不覺已升至0.94元，十分接近1元關。不過見昨日港股大插時此股反而逆流而上，反映北水「睇法」果然夠堅定，已持貨者不妨穩坐釣魚船，唔駛太心急食胡。

另外，既然近期市場熱炒國策受惠股，亦可睇睇近年積極發展智能配電系統解決方案（iEDS）及節能方案的博耳電力（01685），事關主業除配合中央大力推動環保節能的大趨勢外，近年亦積極開拓海外市場，若往後有重大收購，更可炒「走出去」概念。

睇番業績，博耳電力去年全年盈利上升33%至4.5億元人民幣，表現理想，加上今年業務增長目標為30%，都算值得期待。估值方面，集團往績PE約23倍，PB則約5.1倍，睇落唔算平，但股價自年頭至今穩步上揚，昨日再升3.2%，走勢靚絕，進取者不妨分注上車，失守升軌支持即止蝕，策略簡單易明。

A股精要

‧內地券商收緊創業板兩融業務。

‧市傳中央或增資產增值稅。

‧有報道指第二批債務置換額度或為一萬億元人民幣。