昨日港股向市場示範了點先叫A股化，朝早網上傳內地有券商叫停為創業板股票提供孖展，滬綜指連破四千八、四千七關口，影響所及，恒期變咗過山車，十五分鐘內由27,500點水平，直插落26,638點全日低位。

股權追蹤

及後消息未得證實，跌勢方稍見喘定，但好友將期指推回27,505點急插的起步點後無以為繼，無法跟A股倒升，最後日間交易時段收27,450點。在急跌急抽的幫助下，期指成交增至10.2萬張；國期更勁，14.9萬張成交，日市收13,970點。

技術上，昨恒指低位27,094點，逼近50日線27,077點隨即強力反彈，已成為短期重要支持。昨期指早市跌穿26,996點，按破位追沽計劃，筆者要去到26,935點方能搵到對手，之後期指閃過26,638點低位，但三分鐘之後已重返27,000點，之後最高見27,170點，當再殺到26,860點已經跌唔落，即市高低腳見底機會大，筆者最終平手離場，都算執番身彩。

昨日反映短期上落市格局未變，好淡友都無入市必殺決心，似乎勝負還要等下周MSCI公布A股入唔入到指數方有分曉。