六月絕唔絕未知，但五窮月果然厲害，上周四期指結算日，大戶托市的無形之手威力稍減，港股隨即出現山泥傾瀉，周五依然未能力挽狂瀾，最終導致港股五月臨尾香，最後三日跌逾800點，之前累積的升幅一鋪嘔凸，全個月計恒指倒跌709點。

中國輕工業的低廉生產成本優勢早已不存在。（資料圖片）

贏14%

外圍方面，希臘債務陰霾未散，華爾街驚聯儲局隨時加息，歐美股市已露疲態，A股升至五千關口亦漸見地心吸力影響，都係六月股市的一大考驗。上周五夜期收27,089點，比日市再跌75點，港股預託證券計價指數亦跌超過百點，預示港股今朝都好大機會以27,300點樓下開出。

近期唔少公司批股愈批愈升，惟內房股恒大地產（03333）例外，上周配售8.2億股，每股作價5.67元，集資46億元，牛市中折讓17.95%批股已經得人驚，但令人意外係批股價居然守唔住，最後跌26.9%，收5.05元，同今浪高位8.4元比較，累跌四成。

近年恒大一副以地產為基礎，作多元化發展的姿態，漸漸似綜合企業多過地產公司，亦因為咁，唔少對沖基金經理以恒大不專注本業作為沽空理由。以為今次大折讓批股，淡友會把握機會攞貨平倉，殊不知上周五飛插不單止無鳴金收兵，反而集體搭乘全日空，沽空成交激增至1.11億股，較周四足足多出四倍。

恒大同基金鬥法

上周五見外資分析員加入唱淡恒大，德銀出報告叫沽，認為今次配股無助改善財政，畀出2.44元目標價，唔夠周五收市價一半。恒大同與對沖基金鬥法，從沽空活躍度睇，似乎未有落幕迹象，俗語話沙塵滾滾，殺錯良民，散字派在兩軍對峙下，要參一腳實在唔易，內房股捧場客只能先避其鋒，暫時睇少一隻。

國際調查機構IDC最近調低了全球智能手機出貨量預測，其中中國的智能手機出貨量僅得2.5%增長，加上第一季數據顯示更較去年倒退了4%，對內地幾間大型智能手機生產商，好似小米、華為及聯想集團（00992）等今年超樂觀的出貨量預測，猶如一盆冷水照頭淋，經過多年的高速增長，內地智能手機生產已開始呈現飽和初期迹象。

日前富智康（02038）高管表示，準備大舉投資印度設廠，預計投資數十億美元在印度建10至12座組裝廠房，主要考慮印度手機市場，開始進入功能性手機升級至智能手機的周期。

回報隨時有驚喜

由富士康改名開始，在在可見這代工界一哥，正努力洗脫血汗工廠惡名，儘管之前公司預期，將一半組裝工序以機械臂代替人手裝配，但沒有太多大孖沙信以為真。不過，今次印度投資，若真的得到當地政府支持，又是另一個故事。始終中國輕工業，經歷連年的最低工資上調，低廉生產成本優勢早已不存在。

反之，印度人口僅次於中國，勞動力成本依然低企，最重要是智能手機普及率低等有利市場條件，對富智康一類的巨型代工企業的確不可多得，一旦成事，有機會尋求比現時更高投資回報，難怪消息一出，上周五股價即見反應。綜合大行預測富智康一六年純利2.97億美元，預測PE約14.9倍，以接近21%盈利增長率，估值算幾吸引，加埋設廠印度故事，仲會有一段時間醞釀，短炒目標先睇5元，相信較大阻力會係一三年下旬的高位5.6元。