A股未肯回頭，滬綜指眨眼升抵4,900點水平，港股昨日亦如期高開，二三線尤其是落後股都各自各精彩。昨日比亞迪（01211）停牌，傳發A股集資百億元，若然屬實，復牌後股價有得炒，可以留意現成新能源汽車及周邊產業股份。

A股精要

昨日港股通使用額度增至廿億元人民幣，見到兩隻港股通重倉股有異動，其中人和商業（01387）股價急升24%，中芯國際（00981）亦急升9.5%。此外，兩隻內地消費品牌股匯源果汁（01886）及雨潤食品（01068），同以大成交上揚，收市分別升17%及29%。事實上，呢兩隻股在行內具品牌優勢，為內地投資者所熟悉，在北水南來之下，炒高係早晚的事。

惠生啱炒家胃口

雨潤股價四月八日及九日連現兩支大陽燭後進行整固，昨日升上高位見4.14元，成交4.85億元，走勢上可確認破位，剛發力別太早估頂，畢竟現價市帳率唔夠0.5倍。近期豬肉價回升，行業景氣改善，炒家睇中出擊自有其道理。

同類股尚有萬洲（00288）及惠生（01340），其實萬洲股價自四月初以來已累升了近四成，而惠生同期亦累升了近五成，但惠生價位較細，較合炒家胃口，加上上周才以每股1.25元配股集資，呢期批股的股份多數都有得炒。走勢上，短線回吐守1.5元可小注。不過，論人氣，還是以雨潤為首選。