Fundman睇市：昊海有留意價值

繼前日漢能（00566）急瀉後拉閘，尋日輪到另一神仙股高銀孖寶玩插水，高銀地產（00283）及高銀金融（00530）午市一度跌過六成，收市分別跌40.9%及43.3%。前日在下話港股A股化之後，日日都有一堆暴升暴瀉股，股市陷阱唔少，不過公道少少講，如果唔係畀貪念遮住自己雙眼，做些少功課，都未必會買呢一類股票。

以上面三隻股為例，股價狂瀉前，市值最高分別去到3,783億、1,052億及2,471億元，但佢哋過去一年只係分別賺33億、8.5億及7.3億元，PE係114、123同338倍，就算叻到騰訊（00700）咁快盈利增長，再乘二，都覺得貴，根本很難長期支持咁高股價，受地心吸力影響只係遲早問題。依家個市大時代，講基本因素實話唔啱聽，但至少可以避過這一類股市地雷，否則趁牛市賺埋幾多都無用，踩中一隻實聽粉身碎骨。

光伏股未止瀉

漢能急瀉後影響力猶在，光伏股未止跌，聯合光伏（00686）、保利協鑫（03800）、卡姆丹克（00712）及陽光能源（00757）跌幅介乎2至4%，美銀美林話今年多晶矽及矽片價格比預期更疲弱，調低保利協鑫今明兩年每股盈利預測8%及7%，目標價由2.8元降至2.6元，比尋日收市價2.11元高23%，維持買入評級。

中策集團（00235）準備2供1，同場加映70億股配售，集資最多15.5億元，供股價與配股價都係0.15元，比前收市0.295元折讓近半，股價昨日由最多跌21%，到拗腰倒升18.6%，收0.35元。

睇番今次係中策一年內第二次又供又批，一○年買唔成南山人壽後，去年底12.6億資產大部分係現金，除了把現金放貸，基本上同殼股無分別。早幾日公司同華聯簽備忘錄，收購擁有內地網上購物網站hloto.com七成五股權，準備使20億元，加埋今次伸手要錢，應該同收購變身網股的部署有關。個網站營收資料未有，但以目前大約5億殼價，加埋佢手頭現金應值17.6億元左右，未計新股前市值19.6億，溢價唔算多，加埋尋日收市前氣勢咁盛，睇嚟炒家可以瞄多幾眼。

二月至今招股上市新股，八字頭加全配售的升到離晒譜就係人都知，尋日留意到有隻四月底上市的新股昊海生物科技（06826），居然可以在大牛市中，挾179倍超購成績，到今日仲潛緊水，當然吸引小弟貪平的心態，（目及）多幾（目及）。

基金股東坐貨

瑞銀保薦上市的昊海，主業包括研發、產銷醫用可吸收生物材料，目前十四種生物醫藥產品，業務覆蓋內地所有省市，經銷的三級及二級醫院覆蓋率分別為九成及四成。過去三年產品毛利率維持在83.4至87.2%水平，純利為銷售額的增加，由一二年1.13億元人民幣升至一三及一四年的1.41億及1.83億元人民幣，增幅相當強勁。

但呢期個市鍾意玩供求，睇昊海配售4,000萬股H股上市，從彭博所得資訊，Schroders、Prudence同Dragon Billion China幾個基金股東坐住近1,387萬股，佔去配售股份超過三分一，再睇上市首日，超過1,800萬股易手，會唔會落入強者手，大家都只係估估吓，但首兩日之後，成交縮晒，貨乾表徵明顯，但由於大價關係，相信散戶參與興趣有限。昊海59元招股，依家股價57元，處於微潛，27倍PE，相對A股動輒炒到過百倍的生科股容易入口好多。昊海點解唔行？確實有點莫名其妙，不過睇客觀條件，值得留意。

贏16%

暴炒男昨日推介正峰（02389），股價果然旋即爆上，即市高位1.35元，已突破筆者的首站目標，高低位計累升16%！