Fundman睇市：比亞迪展現強勢

中國以世界工廠自居，但出口持續放緩，製造業半條人命，李克強總理又打出一張王牌，發布《中國製造2025》規劃，簡單講，要將低廉成本致勝的製造業，模仿德國式的高端「智慧製造」，得唔得，恐怕無三幾年時間都未見到成果，諷刺嘅係啱啱有網上新聞話中國有人將薯仔、番薯和人造合成樹脂製成的膠米走私出口，柴米油鹽樣樣可以造假，論到不法商人的創新製造技術，中國認咗第二，恐怕都無邊個敢認第一。

講番個市，指數無睇頭早就唔係新聞，港股埋單跌108點，收27,585點，主戰場係一眾市值上百甚至上千億的二、三線股。四月中港股爆升前已經升到無人信的漢能（00566），朝早狂瀉四成六之後拉閘。睇番漢能由三月高位9.07元，撻到落尋日收3.91元，計落市值蒸發2,150億，差唔多夠錢為三跑兼高鐵找數。

喪炒股敲響警鐘

隨着港股愈來愈A股化，這類狂升暴跌的股份真係愈來愈多，唔少散字派認為係十年難得一閏的發達機會，在下反而覺得依家通街土製菠蘿，要搵到隻股票可以重錘出擊愈來愈難，好似漢能、恩達（01480）之類的喪炒股，唔貼市肯定玩唔起，即使睇到實，但閃跌之下，可能經已輸到見骨，甚至乎拉埋閘，曱甴屋一樣有入無出。

以往但凡有焦點二三線出事暴瀉，一些未見經傳的喪炒股，多少會受到牽連，然而尋日完全唔覺有咁情況，好似十大勁升榜，無三成升幅入唔到榜不特止，當中七隻成交億億聲，完全係你有你跌，我有我炒的態度。魚缸炒鬼人人等住深港通落實通車，但依家股市所見，都唔使等正式互通渠道放水，港股經已同A股無異，通埋車之後仲得了！

講番被譽為中國版「工業4.0」的《中國製造2025》，文件涉及不同產業層面，真係闊到暈，航天、軍工、鐵路、生物醫藥及高性能醫療器械、新能源及電力設備等等等等，幾乎各行各業都多少沾到邊。

一方面國策同環境污染開戰，又要推動工業升級，新能源股故事睇落比較實在，比亞迪（01211）啱啱話投資半億美金，在巴西建太陽能電池板基地，目標產能每年400兆瓦，幾乎等於現時巴西全國光伏發電總量四成五，規模唔細，不過短期推動業績的，仲係傳統及電動汽車生意。街外估電力私家車及巴士項目，最快今年、最遲明年可以收支平衡甚至有微利，業績強勁復甦的故事可取，破50元要睇。

至於另一隻華能新能源（00958），四月初因為公募基金入市消息，井噴式爆上3.71元之後，股價無大幅調整不特止，反而在3.13至3.5元之間橫行消化。新能源股有國策支持，始終同喪炒股係有一定分別。

華新能仍有水位

今年首季業績，盈利升五成七，至4.58億人民幣，超越大行估計，主要拜期間風電發電量比估計強勁所賜。睇番舊年第二、三季來自風電收入基數極低，業績延續較大幅增長的機會十分之大，一五年14.2倍PE，以未來兩年約兩成的年增長率，估值應該仲有水位去，守住3.5元，下站先睇4元。