「一周一行」推出後，內地旅客來港少咗，本港旅遊業同零售業首當其衝。大鴻輝興業主席梁紹鴻尋日喺旗下旺角智選假日酒店及服務式住宅One Dundas開幕同劉Sir講，由於內地訪港旅客減少，原本估計內地客佔酒店嘅客源有七成，不過依家得三至四成，同時房間日租金亦較原定低咗22%；佢仲話零售業氣氛差，今年旅遊區舖租至少會跌10%。

大鴻輝興業主席梁紹鴻（左二）表示，旺角智選假日酒店及服務式住宅One Dundas，總投資額約9億元。

智選假日酒店

梁紹鴻話，智選假日酒店係三星級定位，樓高32層，其中6至17樓用作酒店房間，提供147間酒店房，實用面積197至226方呎，四月份試業一個月，但反應未達預期，依家酒店入住率都係得一半左右，以中國及東南亞旅客為主。

同埋依家係淡季，房價都做咗啲調整，由原定每晚900元，下調至700元，調整幅度約22%，佢話希望逐步加返上去。

佢仲話，由於內地旅客減少，原本預計內地客佔酒店客源嘅七成，但依家得三至四成，平均入住一至兩晚。

不過梁紹鴻話，本港旅遊及酒店業旺咗成十年，回調係周期性，依家酒店業全行都轉差，唔介意酒店呢段時間生意差。另旗下太子道西179號精品酒店項目，有約50間客房，預計三至四年後推出。

核心區舖租料跌10%

梁紹鴻仲同劉Sir講，由於零售業下跌，預計遊客區嘅舖位會減租，「就算話加租都喺呃你」；如果租客唔可以成功續租，預計今年核心區嘅舖租較去年高峰至少跌10%；但民生區舖租則有上調空間。

佢仲舉例話，旗下尖沙咀廣東道一個舖位，舊年曾有客出350萬想租，比依家租金高成150萬，但舖位租約明年先到期，就算有好價都租唔到畀人，但今年呢啲租客已經唔見晒。

天水圍地舖削15%租出

至於酒店嘅19至35樓One Dundas，有109伙，實用面積由152至415方呎，戶型由開放式至兩房，租期由一個月至一年，依家先推出一房及兩房，租金分別由2.38萬起及3.78萬元起。

世邦魏理仕尋日發表《零售業務全球化》報告，話舊年香港喺全球零售商進駐地區排第七，有45間零售商首次來港開店；東京喺亞洲地區排榜首。美聯旺舖朱志龍話，天水圍俊宏軒地下L23至L24號舖，以月租12萬元租出，較前租低15%。

大鴻輝旗下智選假日酒店檔案

樓層：6至17樓

房間數目：147間

房間實用面積：197至226方呎

現時房租：每晚700元

原定房租：每晚900元

現時客源：內地客佔三至四成

目標客源：內地客佔七成