雖然近期港股表現反覆,且成交亦有萎縮迹象,但作為今轉大牛市第一梯隊之券商股,近期卻再次回勇,尤其是新鴻基公司(00086)旗下之新鴻基金融投資服務獲光大証券(601788.SH)入股,以及民生銀行(01988)全購華富國際(00952)後,本地券商股無不乘機起動,除主板之外,進取者亦不妨留意在創業板上市的昌利控股(08098)。

暴炒男之所以睇好隻昌利,主要有幾個原因。首先,券商股近期炒到飛起,講到尾都係博被內地資金寵幸,而昌利市值得6.7億元,真正係細細粒容易食。其次,昌利股權相對集中,按港交所(00388)資料顯示,大股東歐雪明已持有68%股權,貨源歸邊有利資金炒上之餘,賣殼的機會亦大啲。

最後,昌利股價自上周三起開始見異動,短短幾日間從0.445元升至昨日的0.61元收市,而且數日成交加埋都係得千二萬元左右,除顯示推上難度不大外,亦不排除短期內或有動作。現價買入,值博率不俗,目標價先睇0.8元,止蝕0.5元。

雅居樂乘勢跟進

配腳方面,昨日內房股幾乎全線起動,不妨揀隻二三線內房短炒一轉,其中雅居樂(03383)股價一連兩日在大成交配合下現大陽燭,加上市盈率得4.5倍,PB得0.6倍,純睇估值都唔算貴,乘近期內房回勇,可吼位小注買入,目標9元,跌穿6元止蝕。