作為港鐵（00066）將軍澳日出康城項目第一個有商場配套嘅第七期，其商業部分極具發展潛力，所以尋日截意向就收到多達28份意向書，創咗鐵路上蓋項目歷來最多意向。除咗長和（00001）、新地（00016）等大型發展商外，亦吸引中資財團萬科置業（香港）及中國海外（00688），以及房託基金領匯（00823）等財團入意向申請「入場券」，市場就預計項目嘅總投資額約莫80億元。

日出康城第七期附設近48萬方呎商場，為項目最吸引之處。

林力山（左）代表萬科遞交意向書。

日出康城第七期截意向書結果

港鐵尋日公布，呢個日出康城第七期住宅及商場項目，一共收到28份意向書，港鐵將儘速進行招標工作。劉Sir知道，今次項目嘅意向書數目，破盡鐵路上蓋物業發展歷來紀錄。

吸引大型發展商

之前紀錄由同屬住宅及商場發展嘅大圍站上蓋大型項目、同埋日出康城第六期共同保持，呢兩個項目喺舊年九月同埋十二月都收到23份意向書。

老友理想城市張聖典就話，日出康城第七期嘅商場部分係最吸引嘅地方，有助分散發展風險，今次截收意向嘅反應，亦反映咗唔少財團有意爭飲頭啖湯，佢估計項目總投資額約80億元。

事實上，今次各家大型發展商都有份遞交意向，包括喺日出康城有豐富發展經驗嘅長和、新地同埋會德豐地產，奪得日出康城第六期的南豐，以及新世界（00017）、恒地（00012）及信置（00083）都有申請「入場券」。

遠展：商場有價值

有多家中資財團都有入意向了解條款，好似萬科、中國海外同世茂房地產（00813）等。萬科置業（香港）業務部助理董事（地產發展）林力山尋日遞交意向書個陣話，項目商場具吸引力，將來任何營運模式都會考慮，但要視乎發展條款。

而領匯、遠展（00035）、資本策略地產（00497）、泛海等財團亦有遞交意向。遠展朱寶林講，商場部分無論任何模式發展都有潛力，項目商場及住宅都有價值。

呢個日出康城第七期住宅樓面大約75.6萬方呎，另有約47.9萬方呎商場樓面，市場估計補地價金額最多42.35億元。