關先生 半退休人士

張小姐 家庭主婦

余先生 自僱人士

翁小姐 家庭主婦

Keith 浸大財務學系二年級生

勤做功課：關先生 半退休人士

「過去一個月，我嘅炒股注碼加大咗起碼七、八倍。之前只用50%身家買股票，但見個市咁旺，最後都選擇All-in，主力買低殘嘅細價股。我收市後會『做功課』，亦有用盡手上嘅孖展額，但完全無諗過要按樓炒股。其實個市升咗咁多，都係時候要減倉。」

發夢爆升：張小姐 家庭主婦

「早前上網『做功課』，先發現自己揸咗兩個幾月隻股票發通告建議易名。我覺得個新名好好聽，心諗『改名後第二日股價一定大升』！結果嗰晚發夢，就夢到隻股爆升喇。隻股票我上星期已經沽咗，都賺到近20%。」

識得收手：余先生 自僱人士

「我讀Year 3嗰年，每日一起身就對住兩個大『芒』炒牛熊，全日走堂，連阿媽個股票戶口都拎埋嚟炒！嗰陣真係上晒癮，每次賺蝕都5、6萬上落，但年幾後埋單計數，發現其實只係賺得幾千蚊，簡直嘥時間，所以忽然清醒。我依家已經唔睇市喇！」

唔想收市：翁小姐 家庭主婦

「喺牛市之下，無可能唔炒股啦！我個人就覺得，如果連牛市都唔炒，（第日）一定會好後悔！我每朝早都會好準時，九點二十分之前一定去到證券行坐定定！就連夜晚瞓覺，自己都仍然諗住要去證券行炒股，根本都唔想佢收市。」

成日睇價：Keith 浸大財務學系二年級生

「我啱啱開始買股票幾個月，大約兩日Trade一次，想試吓實踐上堂學嘅投資知識。我試過睇消息買細價股，因波幅大啲，心情較緊張，會成日查價。最近電話亦裝咗唔少同財經相關嘅Apps，特別留意內地嘅報道同分析，因中央政策影響港股。」