上周既有中證監規範兩融消息，人行降準加埋丁蟹登場，市場要一次過消化三個，實在有點滯。加埋上周一的先升後急回，食驚風散食到飽。滿以為大市好大機會來個高位整固，等本周期指結算，好淡友先來分出高下。殊不知，期指大戶急不及待，上周五施行突襲，掃高滙控（00005）推恒指升至○七年底以來新高收市，升233點報28,060點。

匯源果汁最近動作頻仍，不排除有利好消息跟尾。（資料圖片）

太陽日誌

內銀股抖氣，滙控由大笨象變做小飛象，罕有的成為藍籌升幅王，周五有4.2%進帳，貢獻指數127點。四月初，第一波升浪由北水南調，狂炒重磅中資股及重組概念股帶動，上星期有迹象資金分流至其他藍籌及三、四線股，升市形態在轉變，對滿倉股票，卻未能受惠四月升市的投資者，相信點都有機會嘗點甜頭。

睇番期指戰場，亦都算大時代。上周四，四月國期24萬張未平倉合約，連埋五月8.1萬張，合共約32萬張，印象中是又創紀錄。都仲未計六、九月國期及恒指期貨，單係即月同下月國期等值經已去到2,327億元，意味着國指短期每一個巴仙上落，值23.2億元。

賭得咁大，有趣係現貨成交不升反跌，縮番落二千億元樓下，今個星期三期指結算，好淡期指客相信會主導大市，爭取結算價的互相廝殺，好可能精彩過睇《復仇者聯盟2》。

內地樓市唔冧得

以往人行降準，很多時都以25或50基點的小幅微調出手，故上周突然出到一個百分點降準，有陰謀論認為，係因為中證監講錯嘢引發中港股市場外期貨急跌，一心托市之舉。經過一周思緒沉澱後，史提芬仲係懷疑，人行又點會追住股市大媽鼻息做人咁簡單。

事實上，中國第一季GDP增長得7%，又比去年全年的7.4%繼續下滑，總理李克強口裏說大家要接受較低速的增長，惟去年十一月至今，手底裏卻係從未停過出招，不斷放水。中國首季出口認真麻麻，零售銷售增幅放緩態勢未變，加埋反貪打擊，力谷內需平衡出口經濟的國策，已經證明唔掂。樓市唔冧得，確實好可能係北大人的底線。

睇番首季地產商開發融資總額，下跌2.9%，是十七年來最差，狂放水頂住樓價，同時導引銀行更有效率提供按揭支撐樓市活躍度的措施，肯定今年內仲陸續有來。在下仲未決定到，係買高負債而項目較集中一、二線城市的發展商抑或睇番一啲十幾厘息的內房債券，博人行再減息。不過，主觀睇，阿爺撐住之下，內房股今浪又死唔去，幾乎係可以肯定，情況同○九年有啲相似。

個市開始禾雀亂飛，資金開始四圍搵機會，留意到上周四、五，匯源果汁（01886）成交異動。一直有留意匯源，因為近排真係消息多多，先有三月中中泛（00715）經第三方買入匯源7.9%股份，一四年度業績盈轉虧之後，公司高調搵曾任職可口可樂的梁家祥出任高級副總裁，全面執掌公司生產營運。

股齡短的股民可能未必知，匯源同美國可口可樂關係曖昧，○八年可口可樂曾想全購匯源，最終因為商務部搬出反壟斷法，怕此舉搶埋非碳酸飲品市場而被叫停，當年可樂出價每股12.2元，睇番今日個價得2.89元，未夠當年四分之一。

股價低位現承接

喺連番動作之前，今年一月大股東仲曾經三次增持，今次高調招兵買馬是否有其他部署跟尾？睇佢股價由三月底的2.25元左右起步，炒上四月的3.35元，之後在3元上下區域打滾，調整去到2.65元經已經跌唔落，上周連續兩日成交異動，如果再破3.05至3.1元的短期阻力，應該可以跟番轉。

贏40%

阿莊於四月十四日推介華榮能源（01101），當日股價低見0.88元，其後反覆做好，以上周五高位1.23元計，累積升幅近四成。