今個星期一，以為人行降準托市無死，點知炒家趁好消息出貨，恒指殺到落10日線。當以為丁蟹打低阿爺，周二市況又來個報復式反彈，狂升755點，但尋日攻兩萬八心理關口，居然破位唔升，現貨收市後，期指仲好似倒水一樣炒低水，結論係港股A股化後，就算明知依家處於大牛市，都要食定驚風散至頂得順個市咁拋。

雖然中國外貿數字欠佳，但招商局業績仍備受看好。（資料圖片）

太陽日誌

大行預測招商局國際業績

昨日大市埋單升83點，收報27,933點，國指跑贏恒指，升138點，收報14,669點。尋日的升市，不得不提阿里孖寶，周日第二大股東趙薇攞到香港電影金像獎影后，阿里影業（01060）咁啱斥逾8億元人民幣收購影院票務系統供應商，尋日股份復牌升12.8%收4.22元，計落趙總入股未夠三個月，手上股份帳面已經賺超過50億，認真雙喜臨門。同系的阿里健康（00241）昨日亦再發力，升12.3%，收13.82元，創收購天貓網上醫藥平台之後的收市新高。以最新股價計，阿里健康市值去到1,129億，用乜方式計估值？小弟問一位TMT分析員都話唔識睇。

阿里孖寶鑊氣夠

依家阿里孖寶的炒法，十足十科網熱當年情況，面對呢類股份，散戶只能抱兩種極端的態度，保守的，套用方展博股神師傅的必勝心法︰「及早離場」。但若自問勇過清兵，並有心理準備贏一浪之後可能狠狠輸番舖杰的，人炒你炒都未嘗不可，但要自己定個可以承受止蝕位，一穿就要堅決離場。

隨住近日A股狂升推動財富效應，因為反貪死到直的內地白酒市場谷底反彈，貴州茅台（600519.SH）首季報確認價量回升態勢，大行對餘下三季銷情及業績，態度亦有180度轉變，瑞銀將目標價大升四成去到310元人仔。影響之下，過去兩日內地白酒股鑊氣好勁，老白干酒（600559.SH）以及山西汾酒（600809.SH）都連升兩日，而本地隻銀基（00886）股價近日無乜點郁過，會唔會趁機炒一浸，值得留意一下。

南北車高位抖氣，大媽大叔都繼續搵重組概念股落鑊，尋日推介的中糧控股（00606）狂升23.6%，剩下來有重組條件，股價又仲喺可接受範圍的真係買少見少。尋日見到央企轄下的招商局國際（00144）成交異動，股價尚未破四月九日高位37元，似乎可以優先考慮。

招商系的地產及銀行，重組消息已久聞樓梯響，招商局國際股價升得唔多，顯然同今年首季中國外貿數字麻麻地有關。然而受惠國家一帶一路政策，而且一三年積極海外併購的成果，一五年開始陸續在業績上反映出好處，綜合大行估佢業績會由一四年的45億元水平，三級跳去到一七年的大約71億元，最重要係目前市帳率計，只係1.15倍，比海嘯時期低位0.95倍唔算高出太多，但卻遠低於十年平均的2.11倍，如果對近期炒重組概念的股份有畏高症，招商局國際應該係比較合理的選擇。

東網Money18 App搶先機

另外，港股持續暢旺，各位看官如欲掌握投資先機，請即在Android的Play Store或者iOS的App Store下載東網Money18 App，隨時睇到心水股票免費報價、A股報價及AH差價等，同時亦有專家即市推介，助你縱橫股壇。

贏23%

史提芬昨日推介中糧控股（00606），在重組憧憬重燃下，即市曾高見4.65元，收報4.61元，單日勁升兩成三。