受A股帶動，港股尋日一度再破頂，恒指再創七年多新高28,048點，惟始終未能企穩28,000點關樓上，收報27,933點，升83.36點，主板成交1,878億元。顯然早幾日因炒家調節孖展引發的調整市，震倉力度有限，眼見資金不斷湧港，投資者更加惜貨。呢啲市無得行中間道，唔係上就落，既然踩唔落，繼續反覆上攻係唯一出路，估計國指好快可以試破15,000點關。

內地為穩經濟而大興土木，有助拉動建材需求，利好中建材。（資料圖片）

主板仙股快絕種

A股呢大半年係咁升，炒到兩蚊股、三蚊股先後絕迹，依家話5元股係最平的股票！港股A股化之下，主板「仙股」（當然唔計論證）好快絕種，毫股就紛紛變成蚊股，蚊股變十蚊股，如此類推級級上。睇番資料，以尋日收市價計，主板仙股得番約十隻，大部分成交都有異動，其中中國創新投資（01217）升74%，而剛脫仙班的就有中國數碼信息（00250），股價單日抽高77%！

至於市值低過殼價五億元的主板毫子股，亦有唔少成交有異動，過千萬股成交的有佳訊控股（00030）、萬嘉集團（00401）、珀麗酒店（01189）、恒寶（01367）、大同（00544）、品質（00243）等。雖然話依家仲有好多中資股好炒，仲未到股仔發癲喪升的時候，但亦不排除有部分已獲豐厚利潤的炒家，食胡之後轉投股仔博多舖。

講完細價股，又睇番啲大價中資股，尋日內房股表現都唔錯，潤地（01109）同中海（00688）同升逾5%，萬科（02202）升7%、融創（01918）升一成。阿爺擺到明要撐股市，貨幣政策偏向寬鬆，對內房股而言，信貸危機已大減，有利今年的銷售策略，估值有上調空間，加上對比金融股可謂大落後，追內房股及相關周邊產業股，如水泥、建材股，亦係正路的推想。

近幾年提起中國建材（03323）就諗起佢高負債，不過如今呢個經已唔係首要關注的問題。反而，內地要穩經濟，未來勢必要加大財政政策力度，大興土木，加上各經濟區自貿區受利好政策拉動，有助消化建材市場供應。

中建材現價往績市盈率不到7倍，市帳率啱啱上番1倍，照計仲有得諗。對比海螺水泥（00914）現價往績市盈率12倍，市帳率2倍，市況配合下，博隻中建材上番市盈率10倍即13.7元，相等於市帳率約1.5倍，都唔算過分！