周一港股觸及兩萬八點關口之後,大戶似乎以逸待勞,在高位頻頻換貨,等超買市況完全消化先至再起步,形成港股旗形整固,靜候突破。昨恒指升120點,收27,739點,國企指數率先破位創今浪新高,升248點,收報14,720點,主板成交落番去到1,985億元。

中廣核電力擁全國過半核電機組,可受惠國家推動核電政策。(資料圖片)

太陽日誌

大行預測中廣核電業績

贏40%

阿爺大鑼大鼓幫港股通撥火,講到管理萬七億人仔的公募基金,可以繞過QDII配額入市,但睇番除咗消息公布的頭兩日,105億元人民幣額度用盡之外,港股通的熱鬧情況,好快打回原形,尋日南向剩餘額度97.9億元人民幣,用剩93%。

街外唱到行,話五、六月深港通開車的同時,北向南向限額都會齊齊加碼,真係唔識畀佢嚇死,識就笑鬼死果隻。話雖如此,整體大市成交的確又比二、三月多一大截,過去七日平均2,398億元,錢從何來?唔通真係經羅湖的人肉解款員可以帶到咁多人仔過關咩。

水務股全面開車

國務院印發《水污染防治行動計劃》,內容提到二○二○年全國水環境質量改善目標,香港人成日睇住年年加價的東江水污染的新聞,相信身為消費者,都希望水十條真係可以落實改善供水質素。

受政策消息影響,水務股昨日通通開車,中滔環保(01363)升13.1%、北控水務(00371)升10.3%,康達環保(06136)升10.1%,而中國水務(00855)亦升7.7%。

國務院審核「華龍一號」三代核電技術示範機組,核電股又再發威,上海電氣(02727)爆升20.5%,哈爾濱電氣(01133)升17.3%,中核國際(02302)升16.2%,中廣核電力(01816)都升9.2%。老毛病復發,假如睇番近一兩年業績透明度及增長條件,哈氣同上氣都唔係我杯茶,但純睇圖又真係大成交破晒位,實在唔夠膽亂講個頂會去到邊。

對比之下,內地核電經營一哥、坐擁全國過半核電機組的基金股中廣核電力,估計短期走勢至少無上述兩隻咁飄,股價上星期見過5.1元上市新高之後,本周二、三落番嚟搵支持,周三見4.1元後又再掉頭向上,只要破到4.65元阻力,在全無蟹貨及基金吸到乾晒之下,短期應可再創新高。

睇番中廣核電力舊年業績升36%,至57億元人民幣,收購台山核電廠41%權益的利好開始浮現,上市後淨負債大減88%,融資成本減低,是今、明兩年業績增長的動力來源,一五年PE25.7倍,係就係貴少少,但業績較啱睇之餘,份屬半個國家隊成員的CICC最近出報告唱到5.57元,短炒一轉實在未嘗不可。

東網Money18 App搶先機

另外,港股持續暢旺,各位看官如欲掌握投資先機,請即在Android的Play Store或者iOS的App Store下載東網Money18 App,隨時睇到心水股票免費報價、A股報價及AH差價等,同時亦有專家即市推介,助你縱橫股壇。