正如早幾日指，上周連續三個交易日大成交下留低的上升裂口，回補的可能性微乎其微，尤其上月中國出口數據差勁，在實體經濟愈衰、股市愈要炒的市場共識下，昨日中港股市的強勢未有令人感到太意外。

恒指期貨走勢

昨日提出，只要開市期指唔太過分，都可以搭順風車。結果四月期指以27,390點AO價開出，之後好快在27,191點搵到支持，並以由頭升到尾的姿態，恒指收28,016點，升743點，期指日市收28,030點，國期收14,614點，兩者未平倉合約分別為12萬及28.5萬張。

昨按計劃，趁開市價與上周五收市變動唔大，開好倉搭順風車。基於市況波幅大，僅以平日一半注碼入市，亦因此無視昨日開市早段差不多二百點的震倉，不幸的是單日超過600點的進帳，未有滿倉揸盡。

升市莫估頂，尤其指數啱啱升穿25,000點的海嘯後N年心理阻力，昨收市期指順利升穿上周的即市高位27,999點，只要昨晚外圍無大礙，繼續以每日500點幅度向上叩關的機會唔細。既然手上無滿倉，筆者唔怕大膽少少，以27,800點作止賺，實行一日未見單日指數回頭倒跌，一日都咬住唔放。