上周對兩地股市而言是歷史性的一周，滬綜指重上4,000點、深成指重上14,000點、恒指重上27,000點樓上，滬深兩市創下單日總成交量1.5544億元人民幣，港股亦創下單日成交2,915億元紀錄。卜架睇見嗒晒糖，憧憬好日子才剛開始！

若然睇好兩地證券業務，首選中資券商股。（資料圖片）

還記得舊年十二月，社科院預測一五年滬綜指可能升至5,000點，當時係噓聲多過掌聲。如今滬綜指「坐四望五」經已無懸念。

部分內地資金已逢高減倉A股，轉投B股或H股，上周五B股全線漲停。其實公募基金等正牌軍隊因各種手續及產品推出等問題，應該仲未來港，上周湧港資金好明顯係只是快人一步的民資。故有理由相信，港股成交可以維持暢旺，券商業將成大贏家。

本地薑成收購目標

復市後兩日大升市，主流中資股升定過後，本地券商股於第三日即上周五接力，金利豐（01031）急升78%，英皇證券（00717）升25%，時富金融（00510）及時富投資（01049）分別升42%及16%，華富（00952）升22%，可謂一係唔發市，發市當三年！

事實上，港股一日幾百億成交經已挨咗好幾年，難得如今滬港通終於見真章，港股交投大增，呢批券商股可以話係終於等到時來運到的一日。近年唔少中資券商未有在香港設上市分支的，都積極在港物色收購目標，好似早前光大証券入股新鴻基公司（00086）旗下新鴻基金融便屬一例，相信現成本地券商股仍有機會成為中資大孖沙的收購目標，類似英皇證券及華富都具炒作條件。

不過，若然因為睇好兩地證券業務而選購本地券商股，阿莊認為都係認為現成已具中資背景當屬首選，如海通證券（06837）、國泰君安（01788），一來從事兩地金融業務最重要講人脈同講資本，呢兩瓣都係海證及國泰君安的強項，而其股價表現大概亦已說明資金取向。本月以來海證股價已升咗接近翻一番，國泰君安相對落後。

若然尚未持貨，嚟緊A股有大量新股推出，引發出現高位計一成至一成半的調整，不排除中資券商股亦會借勢整固，屆時可以把握上車機會。

持貨組合方面，上周阿莊以沽貨獲利為主，短線唔會唔買嘢，會睇定啲先至入市兜貨，畢竟呢啲大時代，唔能夠冇貨在手，睇準時機自會出擊。