估唔到班基金經理咁勇，長假期前美股大冧檔都一於少理，將港股推到去到舊年九月高位阻力邊緣度長周末，恒指上周四升192點，收25,275點，從港股假期期間，美股低位拗腰回穩、滬綜指愈升愈狂，尋日以3,961點全日高位報收，又升2.5%，看來今日港股早市升破去年九月滬港通通車前高位25,362點的機會相當大。

南北車合併，有利於內地鐵路設備技術由內銷轉出口。（資料圖片）

太陽日誌

中國南車盈利預測（人民幣）

尋日人行進行200億元人民幣的逆回購，同時將回購利率下調十個基點，是春節假期後第四次下調，應付今個星期新股密集發行水緊期之外，亦都反映中央對A股升勢擺出一副默許的姿態。

不過，阿爺對股市狂態愈抱住縱容的態度，唔少人對內地經濟卻愈係擔心，好似三月內房銷售數據，其實仲係麻麻哋，春節後整體成交量回升，幅度不及市場預期般大，一、二線城市經過春節假後，按月升幅平均不到一成。

似乎人行減息，加上減低二套房首期比例及營業稅免徵政策的推動作用，仲需時發酵，要睇埋四月份數據，先可判斷救市政策會否再加大力度，但自從三月中開始，一線內房股股價全線轉強，似乎基金經理對阿爺出招的成效信心十足。

金飾股提防中伏

假期期間在下去台灣玩幾日，真係從未見過桃園機場可以塞到咁多人，落機到攞行李足足個半鐘，台北遊客區也處處被內地客逼到爆。睇新聞，日本京都一樣有人滿之患，旅遊熱點清水寺，逼到好似維園年宵一樣，睇嚟假期期間香港零售業嗌晒救命，反水貨活動影響仲係其次，景點新鮮感減褪、購物天堂受唔住港紙跟住美金強勢的衝擊先係主因。

由此推論，假期之前突然炒起幾隻本地金飾零售股，好可能只是回光返照，雖然一五年估值普遍都去到單位數，但當假期期間銷售數據出籠，恐怕都好難唔畀大孖沙沽多浸。

為配合一帶一路國策，同時把自身基建技術與資本出口，中國牽頭成立的亞投行，勢估唔到最後一刻，親美的英國、南韓爭相認錢不認人，加入成為始創成員，睇嚟中國如意算盤唔單止打得響，今次做了亞太區基建融通的一哥，更透過亞投行扶持其他亞太區國家基建為名，順便將內地過剩的基建產能消化，可謂一舉兩得。

合併志在走出去

十四年前，中國南北車因應國企市場改革，分拆成兩間公司，一來要防止壟斷，同時希望在足夠競爭下作技術提升。直到去年十二月，傳聞了一段時間的合併計劃落實，兩間公司又再化零為整。講到底，是要配合中國「高鐵外交」，配合走出去的政策，避免開拓海外市場時出現不必要的價格戰以及惡性競爭。

事實上，今日全球大約5.5萬公里在建高鐵項目，近半數在中國境內進行，但隨着內地市場建設開始放緩，遇到需求樽頸只是遲早問題，南北車面向世界的部署，有利於把鐵路設備技術由內銷轉出口。

睇番合併消息一出，中國南車（01766）股價一月初炒上12.66元，但因升幅過大，故之後股價足足橫行了接近三個月，假期前見成交額明顯增加，股價也重上10元關口樓上。

去年中國南車新簽訂單增長約18%，估計今年盈利增長約24%，17.1倍市盈率，估值唔算特別便宜，惟尚算合理，外在消息配合，基金可以選擇有增長故事唔多的考慮下，短期有條件向住12.66元方向進發。