新賣地計劃只係計劃推非核心區商業嘅用地，令到傳統商業區新盤源極之短缺，二手商廈業主自然唔貴唔肯賣。近月港島唔少指標商廈都出現高價成交，上月區內8幢指標商廈雖然只得7宗成交，按月跌咗50%，但成交金額就有約9.72億元，大升約93%，表現最突出係中環環球大廈，成交金額有5.142億元；而今個月指標商廈暫時有約4宗成交，涉額近5億元。代理老友預期今年港島區商廈呎價有望升10%，挑戰3.5萬元。

近月港島區不少指標商廈都錄得高價成交。（資料圖片）

部分商廈成交呎價新高個案

劉Sir睇番啲資料，上個月環球大廈有約2宗成交，按月大跌八成，但成交總值就有5.142億元，按月升咗48.3%，出現價升量跌。

環球大廈獲高價承接

事實上，呢2宗成交都屬於高價，好似以2.242億元連約賣咗嘅中層部分單位，呎價就去到2.95萬元。而一月份呢幢大廈有個別投資者拆售單位，錄得至少10宗成交，帶動成交總值有約3.469億元。

至於上環信德中心雖然上個月只得1宗成交，按月持平，但涉額就大升4.4倍，去到約1.47億元，成交個單位係西翼中層戶，呎價高達2.8萬元，創埋該廈新高。

另外，上個月錄得2宗成交嘅金鐘力寶中心，表現已經算唔錯，事關一月份係零成交；呢2宗成交涉及金額2.66億元，其中一宗係力寶（00226）同力寶華潤（00156）以2.53億元賣出1座高層全層，呎價約2.38萬元。

至於灣仔會展中心、金鐘美國銀行中心及遠東金融中心等，近三個月以來都仍未破蛋。

至於今個月部分商廈已經打破悶局，海富中心本月暫錄3宗成交，比上個月多咗1宗，其中有個高層16室，以呎價約2.17萬元賣出。

而中環皇后大道中九號今個月都有一宗大額成交，有中層全層樓面以約4.12億元賣出，呎價3萬元，估計係今年暫時最大額商廈成交。

零售轉淡藥房又執位

中原寫字樓蔡德寶話，現時好多商廈業主買入物業，會自己長用，所以令到盤源極少，估計今年港島區商廈呎價有機會升10%，呎價有望突破3.5萬元。

有市場消息話，鄰近太子的弼街雙號地舖，面積約500方呎，連500方呎閣樓，獲藥房以7.5萬元租咗，據講該藥房曾租用位置較旺，靠近西洋菜南街嘅山東街舖位。港置趙不京話，近年藥房過度擴張，不惜以高租搶舖，惟現時零售放緩，佢哋亦需要重新執位，由一線街轉到二線街以減低成本。