隔晚美股跌128點，收17,849點，過去四個交易日，日升日跌，議息前美股表現是極為反覆，尚幸是港股選擇跟A股走，滬綜指上破3,400點橫行區後愈升愈癲，昨日又再升2.1%或者74點，收3,577點。

恒指期貨走勢

昨日期指好早已經突破24,045點即市阻力，已經確認反彈勢成，美中不足是由於美國聯儲局議息在即，雖然九成九估佢刪除耐心等候字眼，但華爾街股市點反應仍難判斷，亦令好友昨日無辦法一鼓作氣挾到底，中段期指見過24,221點之後，很長時間在24,170至24,215點之間徘徊，尾市在部分即市盤食胡之下，逐步將期指推低至24,130點完成日市交易，高水10點。

恒指收市報24,120點，升218點，主板成交唔錯，有962億元，相比期指，可以反映唔少基金大戶唔太擔心昨晚議息會出亂子，實行先追為快。

恒指20日及50日線終於重疊在24,372點水平，可以作為恒指短期反彈首個目標。事實上，由25,101點到23,677點的短期調整浪，0.5跌幅反彈阻力與此相當接近，目前在24,389點水平，手上好倉，先不太貪心，訂一個較低的食胡目標，破24,355點開始諗平倉。