二月份因為正值農曆新年，向來係租務淡季，對租金都有啲壓力。不過，今年情況就有啲唔同，事關市民對租屋需求相當強勁，令到上個月百大屋苑平均實用呎租維持喺33元嘅歷史高位，由於上個月尾政府再出手加辣，一班唔能夠入市的準買家，相信會重投租務市場，估計租金嚟緊仲有得升。而今年首兩個月，月租1萬元或以下租務成交佔比例唔夠10%，係有紀錄以嚟新低。

在強勁租屋需求帶動下，上月百大屋苑平均實用呎租維持於33元水平。（資料圖片）

十大屋苑平均實用呎租統計

中原地產黃良昇同劉Sir講，根據佢哋公司新簽嘅租約統計，上個月全港百大私人屋苑平均實用呎租約33.0元，同一月份租金相同，企穩喺歷史高位。

杏花升2.4% 黃埔倒跌

二月份雖然係傳統租務淡季，不過，租金都未見回軟，反映市民對租屋需求強大，支持租金高位企穩。

黃氏仲話，自從本港樓市加辣之後，市場有唔少被淘汰嘅用家紛紛轉買為租，令到租盤迅速被吸納，估計會繼續推動租金上升。

睇番十大藍籌屋苑，上個月以柴灣杏花邨實用呎租升幅最多，平均呎租錄37.7元，按月升咗2.4%，而藍田滙景花園及鰂魚涌太古城按月升咗1.3%及0.7%。

鴨脷洲海怡半島、荔枝角美孚新邨及沙田第一城上個月呎租就不變。不過，鰂魚涌康怡花園、藍田麗港城、天水圍嘉湖山莊及紅磡黃埔花園租金就跌咗，分別按月跌0.3%、0.3%、0.5%及2.9%。

另外，美聯劉嘉輝都話，租金高企，令到1萬元以下嘅細價租務成交愈嚟愈少，今年首兩個月呢類成交只係佔比例約9.69%，對比舊年全年14.3%進一步縮減，比例係有紀錄以嚟最低。

就以佢哋公司嘅成交嚟睇，呢類個案主要集中喺新界區，好似嘉湖山莊景湖居5座高層E室，單位成交月租9,300元，至於屯門時代廣場B座低層4室，成交月租則約8,500元。

又一居2.8萬速租出

除咗大型屋苑之外，中價物業最近租務都唔錯。中原余社朝表示，九龍塘又一居3座高層E室，實用面積657方呎，放租只係三日，就以月租2.8萬元租咗，實用呎租約42.6元。

該行李志豪話，灣仔嘉薈軒中層10室，實用面積608方呎，由外籍人士以月租3.9萬元承租，實用呎租64.1元。