上星期美國勞工部公布的非農就業職位增長遠勝預期，失業率跌至5.5%的七年新低，股市驚死聯儲局提早加息，港股七連跌，前晚道指又插三舊，昨早港股開23,807點，開得唔算低，但之後完全見唔到承接力，全日級級落，最後跌179點，收23,717點，成交783億元。仲有成個星期至到美國議息，呢幾日股民真係好難捱。

三大電訊商均擁有4G牌照後，上客表現可望重新洗牌。（資料圖片）

太陽日誌

晏晝飯聚，一班炒鬼老友完全唔當冧市一回事，唔知仲以為佢哋低吸咗堆暴升三四線股，實質個個老早在中國減息趁高清晒倉，等個市插到夠皮至入市，反而望住美元狂升，唔係研究緊去邊度旅行濕平，就係講緊準備換返多少澳元、英鎊，趁平幫仔女準備定下期學費咁話。

美國可能提早加息，同歐、日息差進一步擴闊，美金近期升到爆，美匯指數前晚抽上98.6，大有挑戰100關口之勢。睇番由舊年七月的80水平起步，半年多少少時間，升值兩成三。港元同美金掛鈎，意味香港人出去旅行，購買力半年大升兩成幾，與其對住個魚缸死死吓捱日子，索性出去使吓錢好過。

手遊股升勢未盡

講番個市，周一叫大家睇番幾隻賤過地底泥的手遊股，IGG（08002）前日見一見4.11元，即市落番唔少，但尋日又逆市升2.1%，唔似咁快玩完，抖完氣之後可以留意。另一隻手遊股博雅（00434）收市後出業績，賺2.8億元（人民幣．下同），升1.07倍。去年網頁遊戲幾乎無增長，代之而起是移動遊戲營業額大升九成五至5.4億元，超越網頁遊戲，現價13倍PE，估值唔貴，應該仲有得玩多陣。

碧桂園（02007）業績，撇除投資物業公允值變動，以及贖回債券費用及匯兌損益，核心利潤92.4億元，升15.5%，與市場預測接近。去年中央壓抑樓價措施初見成效後，已見急急撤離，在經濟吹淡風下，內地房地產調控已經唔存在，但管理層還是訂出一個相對保守的全年銷售目標，1,350億元，比去年多4.8%。

碧桂園現價值博

基於碧桂園一、二線，三、四線城市銷售各佔一半，內地非核心城市庫存過剩問題嚴重，今年對後者銷售毛利應有一定壓力。近日兩會上，中央強烈顯示出穩增長的決心，在阿爺力托下，樓價跌幅可能比預期輕微。雖然公司訂低銷售目標，單位數盈利增長預測，是合理推測，現價2.98元（港元．下同），較重估後的資產淨值6.2元折讓五成二，應足夠反映樓市轉弱風險，3元附近有一定值博率，而去年十一月減息前的低位2.82元，可作為止蝕位。

聯通（00762）及中電信（00728）啱啱先有4G牌，但據中國信息通信研究院發布數據，二月全國手機出貨量2,452萬部，按年升14.4%，其中4G出貨量2,020萬部，按年勁升10.6倍，終於成為主流。調查機構IDC預測，今年中國智能電話付運數字將會達到5.5億，比舊年勁升三成，相信4G手機的普及，以及三間電訊商終於齊齊擁有4G經營牌照唔使跑讓賽下，上客表現應該會再一次洗牌。

都係嗰句，筆者認為聯通及中電信有條件扭轉捱打局面，睇番聯通股價二月中高位為13.36元，獲發FDD 4G牌之後基金大戶趁好消息出貨，跟住個市級級落，尋日低位11.62元，相當於去年10.04元起步位累積升幅的五成二，候低吸納的，應該可以開始買第一注。