上個禮拜五晚道指跌278點，港股都預咗無運行，但恒指只係低開181點，跌幅比預期細，100日線以下水平有唔錯承接，午後在內地股市回升帶動下更一度倒升，最後雖仍跌40點，報24,123點，但就以陽燭收市，成功結束六連陰，不過全日下跌股票有750隻，依然多過升的541隻。至於國企指數在中資金融股做好帶動下，升68點，以11,675點收市，跑贏恒指，大市全日主板成交764億元。

聯華近月股價反覆下跌，相信已反映盈警的負面因素。（資料圖片）

內地股市昨日低開，滬綜指一度失守3,200點，但午後在銀行、保險等板塊做好帶動下回升，滬綜指最後倒升61點，以3,302點收市。

環保股宜趁高食胡

本地內銀及內險股昨日普遍升逾1%，至於上周熱炒的環保及新能源股則有回吐。事實上，環保股炒咗一輪，累積升幅唔少，即使兩會好消息都已經反映晒，所以有貨的投資者，應該考慮趁高沽貨獲利，而無貨者就唔好喺初現調整時手多多買入。

尋日好多細價股都逆市炒上，唔少升幅仲超過一成，但以板塊嚟睇，就無乜炒作焦點。阿莊部署買入的富貴鳥（01819），雖然開喺15元樓下，但成交唔多，阿莊排咗成日，最終都係食白果，買唔到。至於另一隻康健國際（03886），平開之後雖然一度倒跌，但係好快就掃番上去，阿莊見個市氣氛唔好，又唔想追，結果全日就睇住佢升，認真無癮。

聯華超市（00980）自去年九月開始，由5.39元反覆下跌，一月中旬更一度低見3.4元，累積跌近37%。集團已發盈警，料截至十二月底止的年度業績，較一三年度盈利明顯下降，降幅三至四成，主要因為零售業市場競爭激烈及成本增加，特別是人工上漲，但相信股價下跌已充分反映有關負面因素。

目前國企改革正進行得如火如荼，美林上月初曾發表報告，指不排除聯華會採混合所有制及引入策略股東的可能性，意味有可能引發重新估，並為業務帶來協同效應，對本身利潤率微薄的聯華，或有提升盈利作用。

雖然聯華股價已連升四個交易日，但目前估值仍吸引，昨日股價更成功重返250日線4.16元水平，收4.18元，若今日未能企穩在250日線樓上，短期有機會先行回落至100日線3.85元水平整固，屆時阿莊會趁機吸納，第一個目標先睇4.5元。