近排商廈市場備受追捧，當中又以港島灣仔區較為熱鬧，除咗有發展商大手掃貨之外，亦有投資者進駐。劉Sir收到風，資深投資者羅家寶或有關人士近日就以近4,000萬元買入區內豫港大廈20樓全層物業。代理話，羅氏睇好該區寫字樓投資市場，尤其係乙級商廈可以追落後，仲話今次如果遇到有買家出好價，唔排除會以摸貨形式出讓。

灣仔豫港大廈全層獲羅家寶以近四千萬元購入。（資料圖片）

近月灣仔區商用物業成交

中原蔡德寶同劉Sir講，豫港大廈20樓全層，面積約3,301方呎，獲羅家寶或有關人士以約3,961萬元交吉買入，呎價約1.2萬元。

整體做價看升兩成

佢又話，今次羅氏入市掃貨，因為睇好區內商廈發展潛力，而且乙級商廈依然低水，可以追落後，而單位賣方係資本策略（00497）。蔡德寶預計今年整體商廈可以有兩成升幅。

事實上，英皇國際（00163）喺上月底已經以約6.83億元買入區內駱克道75至79號一幢商住大廈，諗住用嚟重建為一幢商業大廈；而喺上年十月佢地又以約8.18億元買入駱克道霸田商業中心。

集富一籃子嗌二億

另外，有市場消息話，同區嘅灣仔道83號中層全層，物業面積約2,200方呎，亦以呎價8,250元獲承接，料涉及金額近1,820萬元。

而美聯陳家輝話，灣仔集富中心1至3樓全層物業，總面積約7,164方呎，以約2.15億元放售，呎價約3萬元，可作食肆或服務業用途。

劉Sir又八到，新世界（00017）旗下嘅銅鑼灣百德新街22至36號原本由酒家承租嘅二樓同埋由戲院租用嘅三樓已經租出，但係佢哋公司發言人就話，現租戶張租約仲未完，有冇新租客就唔太清楚。

之不過，劉Sir覺得個位咁靚，喺正銅鑼灣核心區，唔少商戶一定有興趣，聽講二樓同三樓面積分別約9,400方呎及1.1萬方呎，市場話兩個舖租金市值分別超過56萬同超過60萬元。

另外，美聯唐德財話，由億京持有嘅石門安群街3號基座商場G18號舖位，面積約975方呎，以約3,705萬元沽出，呎價約3.8萬元。

此外，資料顯示，馬頭圍道一個雙號物業以約9,500萬元轉手。