尋日港股相當弱勢，前晚美股跌幅唔算大，但碰上香港零售數據差到極，加埋澳門博彩收入大跌，個市氣氛麻麻，尤其人行第二次減息後，周一股市反高潮，尋日借騰訊（00700）及中資金融股偏軟，恒指跌237點，收24,465點，主板成交779億元，三月期指日市收24,347點，低水118點，但有近百點係反映今個月藍籌派息的影響，實際期指僅輕微低水。

調查指聯通在吸納4G客方面佔優勢，有利股價反彈。（資料圖片）

太陽日誌

周初筆者預計減息後，股市可能趁好消息出現回吐，但勢估唔到弱成咁，尤其中資金融保險股，恒指同國指都連續三日陰燭。近日電訊股同樣出現好消息出貨情況，幅度仲唔嘢小，上星期中電信（00728）及聯通（00762）正式獲發LTE-FDD的4G牌照後，兩股三日內累積分別跌4.3%及6.5%，就連中移（00941）都跌近4%。正如本文之前所指，十二月中兩隻跑讓賽的電訊股已經級級上，顯然春江鴨早有部署，周一把握到機會落車的，應該可以等等。

中興現價不便宜

聯通股價回得最多，皆因全年成績表認真一般，僅賺120.55億元人民幣，按年升15.8%，貼近預期下限，而高管在業績報告中，指在4G投資加大、營改增稅制變動及市場競爭變得複雜下，預告行業收入可能會放緩，都相當趕客。

管理層一五年固定資產投資預算達1,000億元人民幣，比街外估的800至900億元人民幣高一截，主要希望增強4G網絡覆蓋，配合進取的上客策略。就FDD-LTE牌照準備使多啲錢，市場第一時間諗起中國主要4G設備供應商之一的中興（00763），尋日股價升0.26元，收17.52元。

舊年中興份業績已經見到環球4G網絡建設增加的好處，按盈喜的預測，收入及盈利分別增長7.9%及94.2%。過去一年中興在全球取得140份4G網絡建設合約，在整個行業新合約佔有率近兩成，現價一五年PE大約14.6倍，以工業股而言，合理但又未算十分便宜，即使聯通CAPEX大過預期，可以短炒，但升浪未必會好持久。

史提芬反而認為，如果聯通再回得深啲，可以諗吓撈番，一來睇見騰訊及新浪的網上民調顯示，超過四成內地民眾選擇升級4G的話，會揀聯通。FDD牌發咗之後，似乎中移獨大的優勢好有可能進一步被削弱，未來幾個月開始的上客數據，甚至下半年鐵塔公司分拆的消息，都會係推升股價的催化劑，落番12元樓下，可以先補番多少貨底。

紀念鈔一炒無妨

個市咁差，成班炒家百無聊賴，聚埋一齊研究滙豐150周年紀念鈔申請攻略，以150蚊面值至少賣380蚊（唔少套裝推出價格更高），比○九年渣打（02888）同樣的150蚊面值鈔票底價280蚊，高出三成五，先唔講近年祖國反貪，大大打擊這類內地人至愛用嚟送禮的紀念鈔市場，加上滙豐今次推二百萬張，數目亦多過當年渣打一倍。

市場價格向來由供求決定，由此推斷，普通號碼紀念鈔，買番嚟當做善事還可，今鋪未必會炒得起。之不過特別號碼，競投底價都相當進取，單張、三連張及35連張定價去到8,888、13,888及68,888元，比「票面值」分別高58.2倍、29.8倍及12.1倍。正所謂物以罕為貴，加埋得幾百套，斷估紀念鈔個市衰極，短期都未至於「破發」咁肉酸，炒得起的機會點講都比較大，如果屋企有足夠「人頭」，手頭鬆動（因要先兌票），不妨博吓大霧。