Fundman睇市：中資金融股再撻着

股市聽到當然腳軟，恒指早市破一破兩萬五呢個海嘯後多年心理關口，尾市好似倒水一樣，地產股拖住由升轉跌，收24,823點跌78點，成交稍減，主板765億元易手。

金管局三個新措施，包括700萬元以下自用物業按揭成數減到六成，非自住物業按揭只借四成，壓力測試上限及供款佔入息比率，各降一成去到五成及四成。辣招熟口熟面，皆因只係將七至十球「中價樓」嗰套搬埋落去細價樓睇齊。

同中、大銀碼物業唔同，細價樓主要對象係需要上車的無殼一族，每年有五萬幾新人結婚，四萬幾單程證來港人士，對細單位需求唔少。原本諗住儲幾十萬，畀一成首期再經按揭證券公司借埋尾數，這批市民自然被打亂計劃。即使目標係500萬元單位，首期亦由150萬升至200萬元，一般打工仔突然儲多50萬，唔係咁易。

干擾市場乃雙面刃

行政干擾自由市場，向來是雙面刃，細價樓交易係就係會比前冷卻，但短期由買轉租勢必增加，租務市場多一批新客，細價樓租金有價有市之下，劏房呎租貴過豪宅的情況只會進一步惡化。不過，一如以往辣招，措施對地產股影響相信只會短暫。

久聞樓梯響，內地兩間電訊商終獲工信部發出LTE/第四代數字蜂窩移動通訊業務，簡稱LTE-FDD經營牌終於發畀中國電信（00728）同聯通（00762），意味着中國流動電話4G發展，一直讓中移（00941）TD-LTE雙車雙馬的日子終告一段落。

內地每次產業政策出台，話無春江鴨都無人信，上周五中移插1.5%，相反聯通升1.7%，中電信升0.4%，可見唔少醒目錢經已有所部署。

講到預期數據收入增長，加埋今年內地智能手機大冧價之助，聯通會係最大得益者，今年股價累積升近兩成五，跑贏另外兩隻，捧場客或可趁消息，呢兩日趁爆上食一食胡。

內銀內險股短線俏

今個星期進入兩會概念，意想不到，上周六人民銀行宣布存貸款基準利率各減四分一厘，基於啱啱先過咗春節水緊期，實在無乜大行分析員估到一個月之內人行會先降準、再減息，相信中港股市短期會有戲劇性發展。

講番今次同去年十一月減息的最大分別，是當日人行要谷貸款之餘，又怕銀行存款流失，推出不對稱減息，貸款減得比存款多。今次存、貸齊減，銀行的息差反而無受影響，反而資產質素轉壞趨勢，會因應借貸資金成本回落，多少有所減慢，靜咗個幾兩個月的內銀股，好大機會趁機熱鬧起來，龍頭股工行（01398）同市帳率夠平的建行（00939）都啱心水。

人行第二次減息，可確認中國加入歐、亞多國貨幣戰爭之中。今日滬綜指早市，有機會破3,000至3,400點的大型上落區，跟隨德、英、美、日股市見一見今浪新高。中資股之中，內險股算係最能受惠於A股投資收入增加，形同A股Call option一樣，短期炒風應該會進入高潮，揸咗國壽（02628）、平保（02318）或者太保（02601）的投資者，可望穩坐釣魚船。

不過，或者係史提芬杞人憂天，中國國債孳息隨住評級改善及人行過去一段時間不斷提供流動性措施，過去一年級級落，就算國債息長遠未必跟部分西歐國家跌到零水平，但保險公司固定投資收入，長遠會因債券息率追隨中國行低息政策而向下，故內險股中短線會是繼續當炒，但要留意，長遠中國減息幅度如果比市場預期大，可能對內險股會有反效果。