香港人多車多，車位需求好大，唔少炒家睇好車位價錢有得升，乘機炒番轉。好似舊年中拆售嘅新蒲崗康景樓車場，合共約450個車位火速沽清。劉Sir睇番啲成交，原來短短幾個月已經有超過100宗摸售個案，有投資者揸咗約半年，帳面賺36萬元，賺幅約53%，亦有投資者連環賣出兩個車位，每個成功執十幾萬。

車位渴市，新蒲崗康景樓近期錄得多宗車位成交個案。

有投資者持有康景樓車位半年後沽出，升值幅度驚人。

康景樓部分車位短炒獲利個案

資深投資者陳秉志舊年中拆售康景樓停車場車位，由於每個車位售價大部分約六、七十萬元，相比起市區大型屋苑車位超過100萬元起跳，計落唔算太貴，所以除咗用家外，都吸引一班炒家入貨，據聞當時一批荔枝角美孚新邨師奶兵團就狂掃車位。

104萬沽出 獲利36萬

唔少炒家近幾個月見車位價都升咗唔少，紛紛出貨套現，有個炒家舊年中以68萬元買入一個雙號車位，揸咗約半年以104萬元賣出，帳面賺36萬元。

另一個炒家同期以75萬同76萬元買入兩個車位，揸咗約半年以每個94萬元賣出，帳面共賺37萬元。

如果唔要求執多啲，有炒家更成功喺一個月內將車位摸出，好似一個單號車位以76萬元買入，火速以86萬元賣出，帳面賺10萬元或13%。

過往幾年，炒得起嘅車位，多數都係豪宅車位，但舊年連細價車位都唔輸蝕，單係睇番舊年，沙田第一城就有約43宗車位短炒成交，比九龍站擎天半島錄到約19宗，多一倍有多。

第一城短炒賺幅最勁

沙田第一城呢43宗短炒車位，帳面賺幅由逾7%到近58%，賺幅最高係一個4期1樓雙號車位，有個投資者七月初以約36.8萬元買入，到九月中就以58萬元賣出，揸咗約莫兩個半月，帳面賺約21.2萬元，賺幅近58%。喺咁短時間、有咁嘅賺幅，可以話跑贏晒其他類型物業。

至於近兩年有比較多車位短炒嘅擎天半島，舊年都錄到約19宗同類個案，賺幅由近13%到約52%。而豪宅車位業主普遍寧願揸耐啲、賺多啲，有個M層雙號車位，投資者揸咗約半年以170萬元賣出，帳面賺約50萬元。

另外，屋苑有個3樓單號車位，舊年底以190.8萬元買入，揸咗約三個月以240萬元沽出，賺咗逾49萬元或26%。