昨日市場焦點自然係財爺預算案，而史提芬最感興趣的，則莫過於個名起得夠晒「前衞」的未來基金。曾財爺爆響口，話回報會比金管局管理的外匯基金為高，呢吓反手抽擊，打得金管局陳德霖「應一應」。話說上個月，外匯基金發表一四年投資成績表，回報率得1.4%，已經畀人笑衰過散戶，甚至盈富基金（02800），就算金管局乜都唔做，將全部錢賭落去買美國十年債度，回報都唔止呢條數咁話。

本地基金對後市態度審慎，資金流向電力電訊等高息股。（資料圖片）

太陽日誌

話說回來，舊年唔單止金管局投資表現肉酸，對沖基金八成以上都交唔到功課，大家熟悉的國家主權基金，出名如淡馬錫，一四年三月底止年度回報得1.5%，同過去十年複合年回報近9%相比，都水瓜打狗唔見一截，任內年年預算年年錯的曾財爺，憑乜話未來基金將來表現一定好過外匯基金？小弟就覺得極有寶藥黨feel，睇嚟都係氹咗市民落疊先算，到時交唔夠數又係關仁。

耶倫言論留後路

講番大市，前晚美國聯儲局主席耶倫出席參議院作證，提到美國經濟持續改善，暗示未來幾次會議可能修改前瞻性指引，並且考慮加息，但強調六月前唔會提早加息，亦都講明就算前瞻性指引改動，都唔意味聯儲局在幾次會議內會立即加息。加息唔會提早殺到埋身的言論，刺激美股三大指數抽升，道指及標普五百指數創歷史新高，十年期美債息跌0.07厘，收1.98厘。

耶倫講話的擺位，筆者覺得佢亦鷹亦鴿，重申經濟復甦之餘，亦都講明修改前瞻性指引唔代表好快加息，決定權仲係落番喺一五年鴿派主導的聯儲投票委員手上。

中港股市獨憔悴

事實今年一開始，全球央行都預先築起防波堤，怕咗歐央行的量寬引發洪水壓境，瑞士放棄捍衞1.2算匯率死線，丹麥、瑞典減息減到去負利率，在歐洲成熟國家以至亞洲都開始開打貨幣戰爭之下，若聯儲局將加息時間表講得太死，實在無乜着數，一旦公眾認定，聲明中刪除「耐心等候」字眼後，三次會議就開始加息的話，唔單止貨幣政策及市場期望管理會無晒彈性，一旦美元急升或者經濟復甦再開慢車，要延遲加息，就會畀人貨幣政策搖擺不定的印象，倒不如今日提早帶定頭盔好過。

希臘危機大步檻過，繼德股後，前晚英、美股市齊創歷史新高，惟獨中港股市卻是有點拉牛上樹，尋日A股放完長假反高潮，滬綜指最終跌18點，以3,228點收市，港股力保不失，有28點進帳，收24,778點，但看着前晚耶倫講話後急升的美股，睇好者恐怕已失望到極。事實上，昨日整體大市下跌股份稍多於上升股份，市況氣氛其實麻麻。

歐美股市炒到出煙，不過本地基金對後市態度，明顯依然流於審慎，對風險資產胃納，與歐美基金相比形成強烈反差，君可見，昨日唔少資金追逐高息股，公用股如中電（00002）、電能實業（00006）、粵海投資（00270），REITs有領匯（00823）、置富（00778）及冠君（02778），電訊股有香港電訊（06823）、和電（00215）、數碼通（00315）等，一來有耶倫的演說，被視為無風險溢價的美債息回落有關，不過幾個防守板塊的高息股一齊郁，直覺上短期後市好難會威得去邊，事實內地減息同降準兩個勁招都出咗，短期阿爺似乎無乜符弗，港股又再跌入泥漿摔角悶局機會唔細，繼續買住高息股，立於不敗之地不失為上策。