財政預算案未有再出招,市場普遍解讀為無消息即係好消息,發展商即部署加價同加速推盤。南豐昨日下晝就率先大規模加推東涌昇薈160伙嘅價單,仲加咗價約3.28%,價單平均呎價約12,196元,扣咗最多折扣後,折實平均呎價約9,659元。九建(00034)昨日都預告,旺角MacPherson Residence部分單位會喺周內會加價約5%。

昇薈累積售出1044個單位,最新加推的160伙料最快下星期六賣。(資料圖片)

九建楊聰永表示,MacPherson Residence累積套現約10億元。

財政預算案公布後新盤動向

昨日財爺公布完預算案之後,劉Sir連午飯都未食完,突然間就收到南豐加推昇薈嘅消息。

南豐發展地產部總經理鍾志霖話,昇薈累積賣出咗1,044伙,昨日加推嘅160伙,稍後就會公布銷售安排,估計最快下星期六賣樓。

睇番價單,今次昇薈加推呢批單位,價單售價由498萬至5,058萬元,呎價介乎8,888至21,560元,折實呎價大約7,039至17,076元。

鍾志霖又話,昇薈昨日加推嘅單位,扣除折扣之後,平均售價比起第1同2號價單加咗價約3.28%。優惠就繼續維持番第1同2號價單一樣,最多超過20%折扣。

柏傲山快出新價單

九建市務及銷售部總經理楊聰永昨日都同劉Sir講,MacPherson Residence累積賣出咗118伙,佔可售單位超過七成,套現約10億元,平均成交呎價約18,800元,佢認為銷售已經達標,有條件調整售價,今個星期內會將部分單位加價約5%。

佢又話,同系堅尼地城加多近山重推以來賣出咗11伙,套現約2億元,剩番單位唔排除稍後加價。

消息透露,新世界(00017)旗下北角柏傲山亦都積極部署緊加價加推,新價單稍後就會發出,項目累積賣咗278伙,套現約72億元。

悅目搶閘或今開價

另一方面,除咗爭住加價之外,部分發展商就選擇加速推盤。

長實(00001)積極部署開售嘅紅磡悅目,消息透露,今日將好大機會公布首批單位開價,隨即開放示範單位畀公眾參觀,有機會同步展開收票,最快下周閃電式開盤,勢成羊年首個登場新盤。