農曆新年前後向為公司派發花紅及公布加薪消息的「大熱」時間，打工仔定必欣喜萬分，然而，閣下可有想過利用花紅投資「錢搵錢」？不妨向金融人的投資大法取經。

近期不少打工仔都獲發花紅，這筆錢其實可用來投資「錢搵錢」。（資料圖片）

天行聯合李偉傑稱，最好揀流通量高股份。

御峰理財冼康怡認為，美國加息取態溫和。

晉裕環球林偉雄指，睇好A股表現。

中原資產管理黃安盈稱，逢A股調整便會吸納。

李偉傑：內銀股息吸引

天行聯合證券聯席董事李偉傑屬佣金制員工，無定額花紅。他指，「一四年佣金按年多咗三至四成左右，諗住定期同家人遊埠，復活節先去青島，七月再殺去布吉。」

盈利受惠放水

然而，他個人投資策略則會安全第一，「主因近期內地反貪腐及沽空機構出招，選擇大型國企及本港企業會理想啲，最好揀流通量高嘅股份。內地放水有助提升內銀盈利能力，普遍內銀仲有5厘以上股息率，其中工行（01398）諗得過，市值大，可吸引外資同大型基金垂青。」

冼康怡：低吸高息板塊

御峰理財董事冼康怡說：「個人就有兩個月花紅，一收就保留部分交稅，剩低嘅打算儲起。我本身多數會拎花紅嚟投資，但舊年拎咗部分花紅做首期，買咗個300萬單位收租，仲買咗車同去咗趟馬爾代夫，所以今年要忍忍手！」

首選電訊油股

她認為，「美國今年大機會加息，但環球經濟弱，四至五月股市較波動，一旦有大調整或者係入市良機。美國加息取態溫和，年底未必過到一厘息，可候低吸股息率有4厘以上，對經濟周期敏感度高的高息板塊，如石油、電訊等。」

林偉雄：A股ETF睇長線

晉裕環球資產管理投資研究部董事林偉雄個人花紅有六位數字。他說：「內地銀根鬆動咗，為A股添牛氣，我『心郁郁』想長線投資A股ETF（交易所買賣基金）當儲錢。」

內地前景明朗

他續指，「無論長、短線都睇好A股！短線睇，內地放鬆銀根，投資氣氛暢旺，A股仲係環球估值至平嘅市場之一；長線睇，經濟數據『唔靚仔』，阿爺實會做嘢，用政策支持經濟。華夏滬深三百指數ETF（03188）可說是收花紅後最好投資選擇，佢行業分布夠分散，覆蓋範圍又廣泛。」

黃安盈：車企有國策撐

中原資產管理高級副總裁黃安盈坦言，「個人佣金連表現費約80萬，舊年第四季Bonus用嚟交稅、投資，同Renew番美容同瑜伽計劃。」

逢調整速入市

她稱，「平時太忙會買大型股長揸。舊年十二月比亞迪（01211）曾跌到十幾蚊，喺反彈至27蚊入貨，另揸緊長汽（02333）。內地汽車股業績唔好，間中有國策扶持。」

內地經濟改革現曙光，逢A股現調整便會吸納。「出Bonus撞正大調整，便主打掃入南方A50中國（02822）同認購A股基金。」