去年原本新能源汽車股係威係勢，比亞迪股份（01211）一度衝破57蚊關，可惜衰收尾年底插番落去18蚊邊，近日終於回勇重上10日、20日及50日線，而且啱啱出現黃金交叉，尋日收報34.75元，升幅3.4%，睇嚟股價已經築底成功，話唔定可以踢上40蚊！支持位30蚊。

比亞迪從事傳統燃油及新能源汽車業務、手機部件及組裝業務，以及二次充電電池及新能源業務，去年首三季純利倒退16.4%至3.8億元，公司預期去年純利倒退9.6至22.3%，至4.3億至5億元，期內傳統汽車銷售競爭激烈、太陽能電池業務盈利能力受壓，但係手機部件及組裝業務盈利能力提升。本月比亞迪擬發行十年期的30億元人仔境內公司債券，而資金用作擴大電動車同電池產能，同時擬以23億元人仔出售電子部件業務。大摩發表報告，話佢賣電子部件業務可賺16億元人仔，有助更專注於主業兼提供流動性，加上「秦」一月銷售逾1,900輛，佔同期內地混合動力車輛銷售的57%，而且新型號「唐」的平均售價將高過「秦」，睇好未來混合車銷售及均價。